Riksbank rrit normën bazë të interesit në 2%: “Nëse nuk veprojmë tani, më vonë do të jetë tepër vonë”

Banka Qendrore e Suedisë (Riksbank) ka vendosur të rrisë normën bazë të interesit në 2,00%. Sipas guvernatorit të saj, Erik Thedéen, arsyeja kryesore për këtë vendim është fakti se ekonomia suedeze po ecën me ritme shumë të mira.

Këtë deklaratë Thedéen e bëri gjatë konferencës për shtyp, pas njoftimit të vendimit për rritjen e normës së interesit.

Megjithatë, një tjetër shqetësim për ekonominë është rritja e mundshme e inflacionit. Sipas parashikimeve, disa faktorë, përfshirë problemet me furnizimin e mallrave dhe rritjen e çmimeve të naftës si pasojë e luftës në Lindjen e Mesme, mund të sjellin rritje të çmimeve në treg.

I pyetur se përse Riksbank vendosi ta rrisë normën e interesit që tani, kur inflacioni është ende relativisht i ulët, guvernatori Thedéen shpjegoi se ndërhyrja në kohë është pikërisht qëllimi i politikës së interesave.

“Nëse nuk e bëjmë këtë në mënyrë parandaluese, atëherë do të jetë tepër vonë”, u shpreh ai.

Sa i përket mundësisë së një rritjeje tjetër të normës së interesit, Thedéen nuk dha një datë konkrete. Ai iu referua parashikimit të publikuar në shtator, sipas të cilit gjatë vitit të ardhshëm pritet të ketë edhe dy rritje të tjera të normës bazë të interesit.

Burimi:Riksbank

Link: https://www.riksbank.se/sv/press-och-publicerat/nyheter-och-pressmeddelanden/pressmeddelanden/2026/styrrantan-hojs-till-2-procent/