Riksförbundet M Sverige: Tregtarët e makinave bëjnë gjithçka, ja si të shmangni kurthet kur blini ose merrni makinë me qira.

Riksförbundet M Sverige ka përgatitur një listë kontrolli për këdo që po kërkon një makinë të re. Që blerja ose marrja me qira e një makine të jetë sa më e sigurt, duhet pasur kujdes për disa gjëra të rëndësishme si garancitë, ndikimi në mjedis dhe mënyra e pagesës, njofton Konsumentverket (Agjencia Suedeze e Konsumatorit).

Marrja e makinës me qira “privatleasing“ po rritet me shpejtësi

Gjithnjë e më shumë njerëz në Suedi po zgjedhin privatleasing, pra marrjen e makinës me qira në vend që ta blejnë.

Vetëm këtë vit, privatleasing është rritur me 20% krahasuar me vitin e kaluar.

Në tetë muajt e parë të vitit, 31 450 suedezë kanë marrë një makinë të re me qira “privatleasing”.

Sipas Carl-Erik Stjernvall nga Riksförbundet M, kjo rritje ka disa arsye:

“Në treg kanë hyrë disa makina të vogla elektrike dhe më të lira që tërheqin më shumë klientët privatë sesa bizneset. Përveç kësaj, interesat bankare janë më të favorshme dhe çmimet e makinave të përdorura mbeten ende të larta”.

Qindra ankesa çdo vit

Edhe pse shumë njerëz janë të kënaqur me privatleasing, ka edhe të zhgënjyer.

Bordi i Reklamimeve të Përgjithshme (Allmänna Reklamationsnämnden) merr çdo vit qindra ankesa nga konsumatorë të pakënaqur.

“Disa nuk do ta zgjidhnin kurrë sërish këtë mënyrë, sepse në rast problemesh konsumatori është shpesh i pambrojtur”, shpjegon Stjernvall.

Shumë kontrata nuk janë të favorshme për klientin. Problemet më të zakonshme janë vonesat në dorëzim, defektet e makinës ose mosmarrëveshjet për gjendjen e saj kur mbaron periudha e qirasë.

Lista e kontrollit për ata që duan privatleasing

Për të shmangur surprizat, Riksförbundet M këshillon të kontrollohen me kujdes këto tre pika para nënshkrimit të kontratës:

1. Kujdes me çmimet joshëse. Pas një tarife mujore shumë të ulët mund të fshihet një pagesë e parë e lartë, e quajtur “qira e rritur” që mund të arrijë deri në 30 000 korona.
2. Kontrata duhet të jetë e drejtë për të dyja palët. Nëse keni kosto shtesë për kilometra të tepërt, atëherë për kilometra më pak duhet të merrni zbritje.
3. Gjendja e makinës pas përfundimit të qirasë. Kontrata duhet të tregojë qartë se në çfarë gjendje pritet të kthehet makina.
   Shpesh tregtari i makinave ka marrëveshje për ta blerë makinën nga banka për një çmim të caktuar, prandaj mund të kërkojë të gjejë sa më shumë defekte, për ta marrë makinën sa më të rregulluar për stokun e tij.

Këshillë: Lexoni çdo detaj të kontratës dhe mos nënshkruani pa kuptuar plotësisht të gjitha kushtet. Kjo është mënyra më e mirë për të shmangur probleme dhe shpenzime të fshehura.