Riksrevisionen kritikon ashpër Arbetsförmedlingen. Personat me aftësi të kufizuara nuk marrin ndihmën e nevojshme

Gjysma e personave me aftësi të kufizuara nuk marrin mbështetjen që u duhet nga Arbetsförmedlingen. Këtë e tregon një raport i ri i Riksrevisionen, që ngre shqetësime të mëdha për mënyrën si funksionon institucioni.

“Ne pajtohemi me shumicën e kritikave që Riksrevisionen ka paraqitur”, thotë Carola Grubeck, shefe seksioni në Arbetsförmedlingen.

Sipas të dhënave të vitit 2024, 21% e personave me aftësi të kufizuara ishin të papunë, krahasuar me 8% të popullsisë së përgjithshme. Kjo tregon se kjo kategori është shumë më e rrezikuar nga papunësia.

Efikasitet më i dobët staf më pak dhe më shumë takime online

Riksrevisionen vlerëson se Arbetsförmedlingen ka humbur efikasitetin. Shkaqet kryesore janë:

• shkurtimi i stafit,
• kalimi në më shumë takime digjitale,
• mbyllja e shumë zyrave lokale.

Këto ndryshime kanë bërë që institucionit t’i bëhet më e vështirë të ndjekë rastet, të zbulojë nevojat e individëve dhe të mbajë kontakt të rregullt me punëdhënësit.

“Do të na sjellë më shumë kënaqësi kur sistemet e reja që kemi zhvilluar të nisin të funksionojnë si duhet”, thotë Grubeck.

Kritikë ndaj qeverisë kërkohet drejtim i ri

Riksrevisionen thotë se puna e Arbetsförmedlingen duhet të riorganizohet. Duhet të përshtaten më mirë masat për njerëzit me nevoja të ndryshme dhe të kryhen studime për të kuptuar cilat masa funksionojnë.

Qeveria, që nga viti 2024, është detyruar të ndryshojë drejtimin e punës së Arbetsförmedlingen, pasi vendime të mëparshme si mbyllja e zyrave lokale e kanë dëmtuar ndjeshëm punën e institucionit. Riksrevisionen kërkon që qeveria të punojë më afatgjatë dhe të fokusohet te rezultatet.

Përgjigjja e ministrit: “Të gjithë duhen në tregun e punës”

Riksrevisionen kërkon edhe rishikimin e të gjithë rregullores. Ndihma për personat me aftësi të kufizuara përdoret shumë më pak sesa duhet, ndërkohë që tregu i punës mbetet i vështirë.

“Të gjithë, pavarësisht aftësisë së kufizuar, janë të nevojshëm në tregun e punës. Qeveria i ka kërkuar Arbetsförmedlingen të fokusohet te ata që janë më larg tregut të punës dhe aty përfshihen edhe personat me aftësi të kufizuara. Ne presim që institucionin të punojë me synime të qarta për këtë grup”, shkruan ministri i punës, Johan Britz.

Diskriminimi në punë një problem i madh

Sipas SCB:

• 1 në 3 persona me aftësi të kufizuara ka përjetuar diskriminim në punë.
• 16% kanë aplikuar për punë, por nuk janë pranuar edhe pse kishin kualifikimet e duhura.
• 13% janë pushuar nga puna për shkak të aftësisë së kufizuar.
• 15% e grave kanë pësuar bullizëm ose ngacmim në punë.
• 10% e burrave kanë pësuar bullizëm ose ngacmim.

Burimi: Riksrevisionen, SCB, SVT