Rregulla të reja në BE për çantat e dorës. Parlamenti Evropian sfidon Ryanair dhe Lufthansën.

Parlamenti Evropian ka vendosur t’i japë fund tarifave shtesë që kompanitë ajrore vendosin për çantat e dorës. Deputetët në Bruksel duan një ligj të ri që garanton se çdo udhëtar mund të marrë me vete një çantë dore deri në 7 kilogramë pa pagesë shtesë, si dhe të marrë kompensim më të lartë për fluturimet e vonuara.

Kompanitë ajrore, me Ryanair dhe Lufthansa në krye, e kanë quajtur këtë propozim “jorealist”.

Çfarë ndodh sot

Sot pasagjerët kanë të drejtë të marrin 250 deri në 600 euro kompensim nëse fluturimi i tyre vonohet më shumë se tre orë. Komisioni Europian dhe disa shtete anëtare kanë propozuar që kufiri të rritet në katër, pesë ose gjashtë orë, me arsyetimin se do të thjeshtonte procedurat dhe do të ulte numrin e ankesave.

Por Parlamenti nuk pranoi. “Ne nuk do të lejojmë që pasagjerët të presin më shumë. Tre orë janë tre orë,” tha Andrey Novakov, eurodeputet bullgar dhe raportues i propozimit.

Votimi tregoi një pajtim të rrallë në Bruksel: 34 deputetë votuan pro, askush kundër dhe vetëm dy abstenuan. Kështu, Parlamenti i tha “jo” lobit të madh të kompanive ajrore A4E, ku bëjnë pjesë Lufthansa, Air France-KLM, Ryanair dhe British Airways (IAG).

Kompanitë ajrore kundërshtojnë

Grupi A4E reagoi ashpër dhe e quajti qëndrimin e Parlamentit “jorealist”. Ata thonë se rregullat aktuale janë tashmë shumë të ashpra dhe se kompanitë ndëshkohen padrejtësisht për vonesat mbi tre orë, edhe kur përpiqen të shmangin anulimet e fluturimeve.

Ata janë kundër edhe idesë që çanta e dorës të përfshihet me detyrim në biletë. “Pasagjerët duan bileta më të lira dhe të zgjedhin vetë,” thotë A4E. Por shumë udhëtarë e dinë se kjo nuk është gjithmonë e vërtetë veçanërisht ata që kanë provuar të ngrejnë një çantë të mbushur në peshoren e Ryanair-it në aeroport.

Lufta për çantën e dorës

Parlamenti kërkon që çdo pasagjer të ketë të drejtë të marrë me vete një çantë dore deri në 7 kg, me përmasë maksimale 100 cm (gjatësia + gjerësia + lartësia). Përveç saj, do të lejohet edhe një çantë më e vogël që vendoset nën sedilje.

Ndërkohë, Këshilli i Ministrave dhe Komisioni Europian mendojnë se mjafton vetëm një çantë e vogël nën sedilje.

Komisioni madje ka nisur një proces gjyqësor kundër Spanjës, e cila ka gjobitur kompanitë që kërkojnë pagesë për çantat e dorës. Lufta për rregullat e bagazhit duket se ka përfshirë gjithë Brukselin.

Boarding card dixhital apo në letër e zgjedh pasagjeri

Një tjetër pikë e rëndësishme është e drejta për boarding card në letër. Kjo pas njoftimit të Ryanair-it se nga 12 nëntori të gjithë pasagjerët do të detyrohen të përdorin aplikacionin e tyre për check-in. Parlamenti kërkon që udhëtarët të kenë të drejtë të zgjedhin nëse duan versionin dixhital apo atë në letër.

Deputetët gjithashtu propozojnë rritjen e kompensimit minimal në 300 euro për çdo vonesë të gjatë ose fluturim të anuluar, për të gjitha kompanitë  si për linjat e lira ashtu edhe për ato kombëtare.

Negociata të gjata në horizont

Tani fillon një periudhë e gjatë negociatash të quajtura trilogë, ku Parlamenti, Këshilli dhe Komisioni duhet të arrijnë një marrëveshje përfundimtare para verës së ardhshme.

Por situata është e tensionuar. Parlamenti akuzon Këshillin se po nxiton dhe nuk tregon vullnet, ndërsa Këshilli i kundërpërgjigjet se deputetët “nuk e kuptojnë vështirësitë e industrisë ajrore”.

Me fjalë të thjeshta: priten muaj të gjatë debatesh të ashpra.

Një fitore e vogël për pasagjerët

Për udhëtarët, ky vendim i Parlamentit është një fitore e vogël, por me shumë kuptim.

Sepse përse duhet të paguash për një çantë që futet në raftin mbi kokë? Dhe pse duhet të presësh katër orë për kompensim, kur tre orë janë mjaftueshëm?

Kjo është një betejë midis fitimeve të kompanive ajrore dhe dinjitetit të pasagjerëve. Dhe për momentin, pasagjerët po fitojnë me rezultatin 1–0.

Udhëzues i shpejtë për rregullat e reja të BE-së për çantat e dorës

Çfarë vlen sot:

• Kompensim 250–600 euro pas 3 orësh vonesë.
• Vlen edhe për fluturime të anuluara.
• Kufijtë për çantat i vendosin vetë kompanitë (zakonisht 5–7 kg për linjat e lira).

Çfarë kërkon Parlamenti:

• Të mbetet kufiri i 3 orëve për kompensim.
• Rritje e kompensimit minimal në 300 euro.
• Një çantë dore deri në 7 kg përfshihet në biletë.
• E drejtë për boarding card në letër.

Çfarë thonë kompanitë ajrore:

• “Jorealiste.”
• “Pasagjerët duan bileta më të lira.”
• “Na ndëshkojnë për vonesa që s’i shmangim dot.”

Burime: Politico, Reuters, SkyRefund, DutchNews, TravelDailyNews, The Guardian.