Rregulla të reja për patentat në Suedi, disa persona mund të duhet ta ribëjnë testin.

Qeveria suedeze ka njoftuar se do të ashpërsojë rregullat për patentat, lejen e drejtimit të makinës. Rregullat e reja pritet të hyjnë në fuqi më 1 maj 2026 dhe kanë për qëllim të ndalojnë “turizmin e patentave”, një praktikë ku njerëzit në Suedi marrin patentë në një vend tjetër për ta ndërruar më pas me një patentë suedeze.

Sipas qeverisë, shumë persona kanë përdorur një rrugë të ndërlikuar ligjore, duke marrë fillimisht patentë në një vend jashtë BE-së dhe EES-it, e më pas duke e ndërruar në një vend të EES-it ku rregullat janë më të lehta. Kështu ata kanë arritur ta këmbejnë më vonë me një patentë suedeze, pa bërë testin në Suedi.

Mund të duhet ta ribëjnë patentën

Sipas propozimit të ri, ata që nuk përmbushin kërkesat e reja do të duhet ta ribëjnë testin e patentës në Suedi.

“Iniciativa është një hap i rëndësishëm për të ndaluar mashtrimet dhe abuzimet që lidhen me patentat e marra jashtë vendit,” tha ministri i Infrastrukturës dhe Banimit, Andreas Carlson.

Ai shtoi se ndryshimet do të ndihmojnë që të gjithë shoferët me patentë suedeze të kenë njohuritë e nevojshme për të drejtuar makinën në mënyrë të sigurt.

Si funksionojnë rregullat tani

Sipas ligjit aktual, çdo person që jeton përgjithmonë në Suedi dhe ka patentë nga një vend i EES-it, mund ta ndërrojë me një patentë suedeze, pavarësisht se ku është marrë ajo fillimisht.

Kjo ka bërë që disa njerëz të marrin patentë në një vend jashtë BE-së, që quhet “vend i tretë”, dhe më pas ta ndërrojnë në një vend të EES-it që pranon më shumë lloje patentash sesa Suedia. Në këtë mënyrë, ata kanë shmangur testet suedeze të drejtimit.

Kërkesa të reja më të forta

Në propozimin e qeverisë janë përfshirë tre rregulla të reja që duhet t’i plotësojë kushdo që dëshiron të ndërrojë patentën me një suedeze:

1. Shoferi duhet të ketë pasur patentën e ndërruar me të njëjtën kategori drejtimi në një vend të EES-it për të paktën pesë vjet, para se të zhvendoset në Suedi.
2. Patenta origjinale (nga vendi i tretë) duhet të jetë e lëshuar në Ishujt Faroe, Mbretërinë e Bashkuar, Japoni ose Zvicër.
3. Shoferi duhet të ketë bërë një provim drejtimi të miratuar në një vend të EES-it, që mbulon të gjitha kategoritë e patentës.

Qeveria suedeze thotë se me këto ndryshime do të rritet siguria në rrugë dhe do të parandalohet abuzimi me sistemin e patentave.