Rregulla të reja për patentën në Suedi. Nga 1 gushti hiqet kursi i detyrueshëm për praktikën private

Nga 1 gushti 2026, në Suedi do të hyjnë në fuqi rregulla të reja për marrjen e patentës së kategorisë B. Ndryshimet kanë për qëllim ta bëjnë më të lehtë praktikën private të drejtimit të makinës.

Sipas rregullave të reja, hiqet detyrimi për të ndjekur kursin hyrës (introduktionsutbildning) si për personin që mëson të ngasë makinën, ashtu edhe për mbikëqyrësin që e shoqëron gjatë praktikës.

Ministri i Infrastrukturës dhe Banesave, Andreas Carlson, tha se ky është një thjeshtim i rregullave që mund t’u japë mundësi kandidatëve të bëjnë më shumë praktikë.

“Detyrimi për kursin hyrës për praktikën e drejtimit do të hiqet. Ky është një thjeshtim që mund të çojë në më shumë praktikë, sepse e bën më të lehtë që kandidati të ushtrojë drejtimin me disa mbikëqyrës, si prindërit ose të afërm të tjerë”, u shpreh ai.

Qeveria suedeze vlerëson se kursi hyrës nuk ka sjellë përmirësim të cilësisë së praktikës private për patentën e kategorisë B. Për këtë arsye, ajo nuk sheh më arsye që ky detyrim të vazhdojë.

Sipas qeverisë, kërkesa për ndjekjen e kursit është bërë edhe një pengesë për praktikën private, pasi e vështirëson mundësinë që kandidati të ushtrojë drejtimin me më shumë se një mbikëqyrës.

Megjithatë, ndryshimet nuk janë pritur mirë nga të gjithë.

Instruktori me përvojë i autoshkollës, Tommy Samuelson, paralajmëron se heqja e këtij kursi mund të rrisë rrezikun e aksidenteve fatale në trafik.

“Është krejtësisht marrëzi”, tha ai për gazetën GP.

Sipas Samuelsonit, gjatë orëve të mësimit ai sheh shpesh drejtues mjetesh që sillen në mënyrë të papërgjegjshme në rrugë.

“Kur dal në trafik me nxënësit e mi, shoh shumë njerëz që sillen keq në trafik. Pikërisht ata njerëz mund të bëhen mbikëqyrës për praktikën private”, u shpreh ai.

Ndryshimet e reja do të hyjnë në fuqi më 1 gusht 2026 dhe do të zbatohen vetëm për patentën e kategorisë B.

Burimi: GP/Marcusoscarsson

Link:https://marcusoscarsson.se/nya-korkortsregler-borjar-galla-om-tva-veckor/