Rritet kompensimi maksimal në a-kassa, ndryshime të mëdha nga tetori.

Që nga 4 gushti 2025, rritet kompensimi më i lartë ditor që mund të marrësh nga a-kassa (sigurimi i papunësisë). Deri tani ishte 1 200 korona në ditë, por tani bëhet 1 236 korona në ditë për 100 ditët e para që je i papunë.

Sipas qeverisë, kjo do të thotë se një person mund të marrë deri në 800 korona më shumë në muaj.

Kjo rritje është pjesë e reformës së re për sigurimin e papunësisë që është bërë nga qeveria dhe partia e Demokratëve Suedezë (Sverigedemokraterna). Edhe pse ligji i ri hyn në fuqi në tetor, rritja e shumës maksimale fillon më herët për shkak të papunësisë së lartë.

Ndryshime të mëdha nga 1 tetori

Nga 1 tetori 2025, hyn në fuqi një ligj i ri për a-kassa.

Ndryshimet më të mëdha janë:

• Aplikimi për kompensim bëhet çdo muaj, jo më çdo javë.
• Paratë do të paguhen në fund të muajit, në vend që të jepen çdo javë.

Kompensimi do të bjerë më shpejt

Sistemi i ri e ul përqindjen e kompensimit më shpejt:

• Ditët 1–100: marrin 80% të pagës (si më parë)
• Ditët 101–200: 70% të pagës
• Ditët 201–300: 65% të pagës

Pas 300 ditësh, nëse je ende i papunë, mund të marrësh ndihmë aktiviteti. Por kjo ndihmë ulet me 5% çdo 100 ditë, derisa të arrijë minimumi 365 korona në ditë.

A-kassa do të bazohet në të ardhura

Me ligjin e ri, për të marrë a-kassa, duhet të kesh fitime të mjaftueshme, jo thjesht të kesh punuar një numër të caktuar orësh.

Kushtet e reja janë:

• Duhet të kesh fituar të paktën 120 000 korona gjatë 12 muajve të fundit.
• Duhet të kesh të ardhura mujore prej të paktën 11 000 korona, për një numër të caktuar muajsh, që të kesh të drejtë për një numër të caktuar ditësh kompensim.

Nëse nuk i ke fituar 120 000 korona, mund të marrësh kompensim për 66 ditë, nëse ke pasur të paktën 11 000 korona për 4 muaj rresht.

Sa ditë kompensim mund të marrësh:

Ditë kompensimi  Kërkesa për të ardhura mujore
66 ditë.                        11 000 kr në 4 muaj rresht
100 ditë.                      11 000 kr në 4–7 muaj
200 ditë.                      11 000 kr në 8–10 muaj
300 ditë.                      11 000 kr në 11–12 muaj

Përqindja e kompensimit varet nga sa kohë ke qenë anëtar

• Nëse ke punuar dhe ke qenë anëtar në a-kassa për 12 muaj, merr 80% të pagës.
• Nëse ke qenë anëtar për 6–11 muaj, merr 60%.
• Nëse ke qenë anëtar për më pak se 6 muaj, merr 50%.

Ligji i ri do të vlejë vetëm për ata që marrin vendim për a-kassa pas 1 tetorit.

Ata që kanë marrë vendim para kësaj date, do të vazhdojnë të marrin kompensim sipas rregullave të vjetra, shkruan Inspektorati për Sigurimin e Papunësisë (IAF).

Burimi: arbete.se