Rritja e çmimeve të ushqimeve trondit ekonominë suedeze. Alarm për inflacionin

Inflacioni në Suedi mund të marrë një kthesë të rrezikshme, dhe çmimet e larta të ushqimeve janë një faktor kyç në këtë zhvillim. Ekspertët paralajmërojnë se ekonomia është në një situatë delikate, ku familjet shpenzojnë më pak, kursimet mbeten të larta dhe pritshmëritë për inflacionin po rriten.

Sipas Dagens Industri, barometri i besimit të konsumatorëve tregon një situatë të zymtë: shpenzimet për blerje të mëdha janë në nivele të ulëta, ndërsa bizneset planifikojnë rritjen më të madhe të çmimeve në dy vitet e fundit.

– Nëse inflacioni përshpejtohet para se ekonomia të ketë mundësi të rimëkëmbet, Banka Qendrore do të përballet me një sfidë serioze, shkruan ekonomistja Felicia Åkerman.

Një tjetër sinjal shqetësues vjen nga Aftonbladet, ku Andreas Cervenka vëren se çmimet e ushqimeve janë rritur me 2,2% në janar dhe që nga fillimi i vitit 2022, rritja ka arritur në 28%.

– Rritja e shpejtë e çmimeve të ushqimeve është si të ndezësh zjarr pranë një magazine me municione – një recetë për katastrofë, shkruan ai dhe ngre pyetjen:

– Kur do ta kuptojnë politikanët suedezë rrezikun?

Me rritjen e vazhdueshme të çmimeve dhe shqetësimet për një inflacion të ringjallur, pyetja kryesore tani është si do të veprojë qeveria për të mbrojtur ekonominë dhe konsumatorët.