Rritje e madhe e konfiskimit të patentave në Suedi. Edhe shkeljet e vogla po ndikojnë.

Numri i patentave të konfiskuara në Suedi është rritur ndjeshëm vitet e fundit. Sipas të dhënave nga Transportstyrelsen, gjatë tre viteve të fundit numri është rritur nga rreth 35,200 në pothuajse 40,000, që përbën një rritje prej 14%.

Arsyet më të zakonshme për konfiskimin e patentës mbeten tejkalimi i shpejtësisë dhe drejtimi i mjetit nën ndikimin e alkoolit ose drogës. Por autoritetet theksojnë se edhe shkelje të tjera serioze janë në rritje, si kalimi me semafor të kuq apo mosmbajtja e distancës së sigurisë nga automjeti përpara.

Zyrtarët bëjnë të ditur se edhe shkeljet më të vogla po çojnë gjithnjë e më shpesh në humbjen e patentës. Kjo kategori ka pësuar rritjen më të madhe. Në rastet kur një person kryen disa shkelje të vogla të përsëritura, mund të hapet hetim dhe më pas të merret vendim për konfiskim.

Fillimisht, autoritetet japin një paralajmërim për drejtuesit që shkelin rregullat disa herë. Nëse sjellja nuk ndryshon, atëherë merret vendimi përfundimtar për konfiskimin e patentës. Vetëm vitin e kaluar, 2,433 persona humbën patentën për shkak të disa shkeljeve të vogla që, të marra së bashku, u konsideruan të rënda.

Në total, konfiskimet për shkelje të vogla janë rritur me 30%. Autoritetet shpjegojnë se kjo lidhet edhe me rritjen e kontrolleve nga policia dhe informacionin që vjen nga institucionet e tjera, si gjykatat dhe mjekët.

Një tjetër arsye për konfiskimin e patentës është edhe përfshirja në krime të rënda, edhe nëse personi nuk ka bërë shkelje në trafik. Vitin e kaluar, 338 patenta u konfiskuan për këtë arsye, një rritje prej 300% në katër vitet e fundit. Ligji mbështetet në parimin se mënyra e jetesës së një personi ndikon edhe në mënyrën si ai drejton mjetin.

Sipas statistikave për vitet e fundit, arsyet kryesore për konfiskimin e patentave përfshijnë:

• Drejtimin nën ndikimin e alkoolit ose drogës: 6,851 raste në 2025 krahasuar me 6,445 në 2024
• Largim nga vendi i ngjarjes (Aksident): 139 raste në 2025 dhe 289 në 2024
• Shkelje të shumta të vogla: 1,873 në 2025 dhe 2,433 në 2024
• Shkelje të rënda, kryesisht tejkalim shpejtësie: 19,281 në 2025 dhe 21,114 në 2024
• Problemet me besueshmërinë për sa i përket alkoolit: 1,252 në 2025 dhe 1,563 në 2024
• Krime të përgjithshme: 245 në 2025 dhe 338 në 2024
• Arsye mjekësore: 7,173 në 2025 dhe 6,234 në 2024
• Mosdorëzim i certifikatave mjekësore ose provave të drejtimit: 4,141 në 2025 dhe 4,023 në 2024
• Pengesa gjatë dhënies së patentës: 6 raste në 2025 dhe 21 në 2024

Në total, janë regjistruar 38,709 konfiskime në 2025 dhe 39,949 në 2024. Duhet theksuar se një patentë mund të konfiskohet për disa arsye njëkohësisht, prandaj shifrat nuk përputhen gjithmonë kur mblidhen sipas kategorive.

Megjithëse trendi është i qartë dhe numri i konfiskimeve po rritet, autoritetet nuk japin një arsye të vetme për këtë zhvillim. Sipas tyre, kjo mund të lidhet me disa faktorë të ndryshëm ose edhe me ndryshime natyrore në statistika.

Burimi: Carup

Link:https://carup.se/stor-okning-av-indragna-korkort-av-ovantat-skal/#google_vignette