Rritje e madhe e rasteve te Përmbarimi suedez pas ndryshimit të ligjit

Që nga ndryshimi i ligjit në vitin 2022, është rritur ndjeshëm numri i kërkesave për kthimin e parave nga Agjencia Suedeze e Sigurimeve Shoqërore (Försäkringskassan) që përfundojnë te Agjencia Suedeze e Përmbarimit (Kronofogden).

Sipas një raportimi të TV4 Nyheterna, pas ndryshimit të ligjit, 17% e kërkesave për kthimin e parave të papaguara janë dërguar te Kronofogden. Para ndryshimit të ligjit, kjo shifër ishte vetëm 2%.

Ndryshimi ligjor i vitit 2022 i dha Försäkringskassan mundësinë që kërkesat e papaguara për kthimin e parave t’ia dërgojë drejtpërdrejt Kronofogden-it. Gjithashtu, afati për kthimin e parave u shkurtua në një vit.

Sipas Albin Palmqvist, drejtues i projektit në Inspektoratin për Sigurimet Shoqërore (ISF), i cili ka kryer shqyrtimin, personat që preken më shumë nga ky ndryshim janë ata që kanë gjendje të vështirë ekonomike.

Palmqvist thekson se ky ndryshim e ndihmon shtetin të mbledhë më lehtë paratë që i detyrohen, por në të njëjtën kohë rrit rrezikun që më shumë njerëz të përballen me pasoja financiare.

“Përparësia është se shteti e ka më të lehtë të mbledhë paratë e papaguara. Ana negative është se më shumë njerëz rrezikojnë të marrin shënime negative në regjistrin e kreditit dhe të përballen me probleme të tjera“, shprehet ai.

Shënimet negative në regjistrin e kreditit mund t’u krijojnë njerëzve vështirësi financiare, duke e bërë më të vështirë marrjen e kredive dhe lidhjen e disa kontratave.

Burimi: TV4/ISF

Link:https://www.tv4.se/artikel/4TiCpVUZsFsg3cny35XN1V/explosion-av-kronofogdeaerenden-naer-foersaekringskassan-driver-in-mer

https://isf.se/publikationer/rapporter/2026/2026-10-22-effektivare-indrivning-av-aterkrav