Rritje e vogël e ndihmave dhe pensioneve në Suedi në vitin 2027

Studentët, prindërit në pushim prindëror dhe pensionistët në Suedi nuk duhet të presin rritje të mëdha të përfitimeve financiare gjatë vitit 2027. Sipas përllogaritjeve të bankës suedeze Swedbank, rritja e shumës bazë të çmimeve (prisbasbelopp) do të jetë e vogël dhe, si pasojë, edhe rritja e ndihmave dhe pensioneve do të jetë modeste.

Në vitet e fundit, inflacioni i lartë bëri që shuma bazë të rritej ndjeshëm. Por gjatë dy viteve të fundit, rritja e çmimeve është ngadalësuar dhe kjo ka bërë që edhe rritja e shumës bazë të jetë më e ulët. Kjo shumë përdoret për të llogaritur shumë përfitime shtetërore, si ndihma për studentët, kompensimi për pushimin prindëror dhe pensioni i garantuar.

Sipas llogaritjeve të Swedbank, të bazuara në indeksin e çmimeve për muajin qershor, shuma bazë do të rritet me 400 korona, duke arritur në 59.600 korona në vitin 2027.

Për studentët dhe pensionistët kjo do të thotë një rritje prej më pak se 100 koronash në muaj, ndërsa pagesa maksimale për prindërit që janë në pushim prindëror do të rritet me rreth 250 korona në muaj.

Ekonomistja për mirëqenien financiare në Swedbank, Madelén Falkenhäll, thekson se edhe pse shumë punëdhënës u ofrojnë prindërve kompensime shtesë gjatë pushimit prindëror, familjet që varen vetëm nga përfitimet shtetërore mund të jenë më të goditura nëse vazhdojnë të rriten qiratë dhe çmimet.

“Shumë familje tashmë po përballen me vështirësi ekonomike. Nëse inflacioni rritet përsëri, situata do të bëhet edhe më e rëndë. Rritja e qirave zakonisht ndodh me vonesë, prandaj shumë familje ende kanë përpara rritje të qirasë”, tha ajo për agjencinë suedeze të lajmeve TT.

Sipas Falkenhäll, edhe punëmarrësit nuk do ta ndiejnë shumë rritjen e shumës bazë, edhe pse për disa do të ketë një ulje të vogël të tatimit.

Personat me të ardhura të larta do të paguajnë rreth 300 korona më pak taksa në muaj, pasi kufiri mbi të cilin paguhet tatimi shtetëror mbi të ardhurat do të rritet automatikisht.

“Për shumicën e punëmarrësve dhe pensionistëve, tatimi do të mbetet i pandryshuar”, tha Madelén Falkenhäll.

Çfarë ndryshon në vitin 2027?

• Kompensimi maksimal për pushimin prindëror rritet me 8 korona në ditë, ose rreth 250 korona në muaj.
• Ndihma financiare për studentët rritet me 90 korona për çdo periudhë katërjavore, krahasuar me semestrin e vjeshtës 2026.
• Pensioni i garantuar rritet me rreth 80 korona në muaj.
• Të ardhurat bazë për llogaritjen e pagesës së sëmundjes rriten, duke bërë që kompensimi maksimal gjatë sëmundjes të shtohet me 8 korona në ditë, duke arritur në 1.267 korona në ditë.
• Kufiri për pagesën e tatimit shtetëror mbi të ardhurat rritet në afërsisht 56.500 korona në muaj, nga 55.000 korona që është në vitin 2026.

Shuma bazë e çmimeve dhe shuma bazë e të ardhurave përdoren si referencë për llogaritjen e pensioneve, përfitimeve të ndryshme dhe tatimeve në Suedi. Këto shuma ndryshojnë çdo muaj janar, ndërsa vendimi përfundimtar merret nga qeveria suedeze në buxhetin e vjeshtës, ku shifrat mund të ndryshojnë para miratimit.

Burimi: Swedbank/ SCB/TT/SVD

Link: https://www.svd.se/a/16WGzW/blygsam-bidragshojning-att-vanta-nasta-ar