Shikohet si krim përdorimi i IPTV-së ilegale në Suedi

Qeveria po shqyrton të bëjë të dënueshme shikimin e IPTV-së ilegale. Hetuesja Eva Bergquist ka propozuar këtë masë në një shtesë të hetimit për filmin, që iu dorëzua ministrit të Kulturës, Parisa Liljestrand (M), të martën.

Ministrja Liljestrand tha:

“Paratë që duhet të shkojnë tek krijuesit e kulturës dhe organizatat sportive përfundojnë drejtpërdrejt në xhepat e kriminelëve.”

Hetimi sugjeron që ligji për ndalimin e pajisjeve dekodues të rishkruhet, në mënyrë që të mund të aplikohet edhe tek individët privatë. Sipas propozimit:

• Përdorimi i IPTV-së ilegale do të dënohet me gjobë.
• Ata që ofrojnë dhe menaxhojnë këtë shërbim mund të marrin burg deri në gjashtë vjet.

Derisa më parë ishte e paligjshme vetëm të ofrohej IPTV ilegale, shikimi i saj ka qenë pa rrezik.

Sipas kompanisë së analizave Mediavision, rreth 635,000 familje suedeze përdorin ndonjë formë të IPTV-së ilegale, duke gjeneruar një qarkullim vjetor prej 1,4 miliardë kronash.