Shoqata e punonjësve të shëndetësisë në Suedi: Garancia e re nuk mjafton për të shkurtuar listat e pritjes

Vårdförbundet kërkon më shumë personel të kualifikuar, burime të mjaftueshme dhe kushte të qëndrueshme pune për të përmirësuar shërbimet shëndetësore.

Shoqata Suedeze e Punonjësve të Shëndetësisë, Vårdförbundet, vlerëson se listat e gjata të pritjes për shërbimet shëndetësore në Suedi nuk mund të shkurtohen vetëm përmes vendosjes së një garancie të re për kujdesin shëndetësor.

Kryetarja e shoqatës, Sophia Godau, thekson se për të ulur kohën e pritjes nevojiten më shumë punonjës të kualifikuar, burime të mjaftueshme dhe kushte të qëndrueshme pune.

“Listat e pritjes shkurtohen para së gjithash kur shërbimi shëndetësor ka personel të mjaftueshëm dhe të kualifikuar, burimet e nevojshme dhe kushte të qëndrueshme pune”, deklaroi Godau.

Gjatë verës, eksperti i caktuar nga qeveria suedeze për këtë çështje paraqiti propozimet për garancinë e re të kujdesit shëndetësor.

Sipas propozimit, të gjithë pacientët duhet të marrin shërbimin shëndetësor brenda 90 ditëve. Ky afat është më i shkurtër se ai i parashikuar nga sistemi aktual, ku pacientët mund të presin deri në 90 ditë për vizitën e parë te mjeku dhe më pas edhe 90 ditë të tjera për të marrë trajtimin.

Edhe Shoqata Suedeze e Mjekëve, Läkarförbundet, ka paralajmëruar më herët se vendosja e garancisë së re nuk do të thotë automatikisht se listat e pritjes do të shkurtohen.

Sipas këtyre organizatave, përmirësimi i situatës në shëndetësi nuk varet vetëm nga ndryshimi i afateve të garancisë, por edhe nga sigurimi i personelit, burimeve dhe kushteve të nevojshme për trajtimin e pacientëve.

Burimi: Lakartidningen

Link: https://lakartidningen.se/nyheter/lakarforbundet-varnar-for-risker-i-utredningen-behovsstyrd-vard/