Shtetet e BE-së kërkojnë masa më të ashpra për emigracionin. Gjermania ndryshon qëndrim ndaj azilkërkuesve, Danimarka dhe vende të tjera duan që ata që marrin refuzim të largohen më shpejt nga Evropa.

Ministrat e emigracionit nga disa vende të Bashkimit Evropian janë mbledhur në Kopenhagen për të diskutuar mbi mënyra të reja për të përballuar çështjen e azilit dhe emigracionit.

Danimarka, e përfaqësuar nga ministri Kaare Dybvad Bek, ka propozuar që personat që marrin përgjigje negative për azil të largohen më shpejt nga BE. Ai tha se gjithnjë e më shumë vende tani po mbështesin këtë ide.

Një ndryshim i madh ka ndodhur edhe në Gjermani. Qeveria e re e udhëhequr nga kancelari Friedrich Merz ka lënë pas politikën e hapur të Angela Merkelit dhe po kërkon kontrolle më të forta në kufi. Kjo kthesë e Gjermanisë ka shtuar mbështetjen për masa të reja emigracioni në të gjithë BE-në.

Në një takim të fundit në malin më të lartë të Gjermanisë, Zugspitze, u diskutua mundësia që kërkesat për azil të shqyrtohen jashtë BE-së. Një ide tjetër që po fiton terren është krijimi i “qendrave të kthimit” jashtë Evropës, ku të dërgohen ata që nuk marrin azil, në pritje të kthimit në vendet e tyre të origjinës.

Edhe Suedia, edhe pse nuk mori pjesë me ministrin e saj të emigracionit në takimin në Kopenhagen, është pozitive ndaj këtyre ideve.

Ministri danez theksoi se gjysma e njerëzve që kërkojnë azil në Evropë marrin refuzim, por vetëm një në katër kthehet në vendin e tij. Ai tha se është koha për zgjidhje të reja dhe më efektive.

Takimi në Kopenhagen ishte jozyrtar, dhe nuk u morën vendime konkrete, por u hodhën hapa drejt ndryshimeve të mëdha në politikën e emigracionit në BE.

Burimi: Aftonbladet