Shumë suedezë bëjnë të njëjtin gabim në deklaratë, paralajmërimi nga Skatteverket.

Administrata Tatimore Suedeze (Skatteverket) ka dalë me një paralajmërim të ri, pasi një raport tregon se shumë persona po bëjnë të njëjtin gabim kur plotësojnë deklaratën e të ardhurave.

Tre vite më parë, Skatteverket kreu një kontroll për të ardhurat e vitit 2020. Kontrolli u përqendrua tek suedezët që kishin të ardhura kapitale nga jashtë me vlerë të paktën 2 000 krona.

Vetëm 22% e atyre që nuk u përfshinë në kontroll deklaruan vullnetarisht të ardhurat e tyre të huaja në deklaratë. Ndërsa nga ata që u kontrolluan, 65% i raportuan të ardhurat. Ky ndryshim ka pasur efekt afatgjatë.

“Analiza jonë tregon se kontrolli ndikoi në sjelljen e njerëzve dhe se ky efekt vazhdon edhe pas disa vitesh. Pas tre vitesh, më shumë nga ata që u kontrolluan vazhdojnë të raportojnë të ardhurat e tyre të huaja”, tha analisti i Skatteverket-it, Daniel Hallberg, në një deklaratë.

Sipas tij, 31% e atyre që u kontrolluan i raportuan të ardhurat, krahasuar me vetëm 22% të të tjerëve.

Nuk dihet pse ndodh

Skatteverket thotë se arsyeja pse shumë persona nuk i raportojnë të ardhurat e huaja nuk është e qartë.

“Mund të bëhet fjalë për fshehje të qëllimshme, por gjithashtu edhe për gabime të pavetëdijshme për shkak të mungesës së njohurive për rregullat. Sipas ligjit, të gjitha të ardhurat duhet të deklarohen, edhe ato që nuk tatohen në Suedi”, thuhet në njoftimin e Skatteverket.

Më e përhapur tek të rinjtë

Sipas raportit, deklarimi i pasaktë i të ardhurave nga jashtë është më i zakonshëm tek të rinjtë dhe tek personat me të ardhura të ulëta nga puna.

“Fakti që bëhet fjalë për shuma të vogla dhe që ndodh më shpesh tek grupet më të reja në moshë tregon se problemi ka të bëjë me mungesë njohurish për rregullat dhe ndoshta edhe me keqkuptime rreth informacionit që Skatteverket merr për të ardhurat jashtë vendit”, shpjegon Hallberg.

Ndryshime të reja në deklarim

Këtë vit, Skatteverket ka ndryshuar mënyrën e deklarimit të të ardhurave kapitale nga jashtë në shërbimin e tij elektronik.

Tani çdo e ardhur e huaj duhet deklaruar veçmas për secilin vend, në fusha të posaçme të e-deklaratës, ku duhet të shkruhen si shuma, ashtu edhe emri i vendit.

Përmes shkëmbimit të informacionit me vende të tjera, Skatteverket merr çdo vit rreth një milion të dhëna kontrolli që lidhen me më shumë se gjysmë milioni suedezë.

Këto të dhëna vijnë nga gati 100 vende të ndryshme.