Situatë serioze e moti në Suedi, autoritetet bëjnë thirrje për kujdes.

Paralajmërimet e lëshuara nga Instituti Suedez i Meteorologjisë dhe Hidrologjisë (SMHI) për disa pjesë të bregdetit lindor gjatë fundjavës janë serioze dhe duhen marrë me shumë kujdes. Kështu shprehet meteorologia e TV4, Madeleine Westin.

Ajo u bën thirrje të gjithë banorëve që ndodhen në zonat e prekura të respektojnë paralajmërimet dhe të shmangin rreziqet e panevojshme.

“Kemi një situatë serioze moti dhe tashmë janë krijuar shumë të ashtuquajtura ‘kanone bore’”, thotë Madeleine Westin për televizionin TV4.

Sipas saj, kushtet e vështira të motit me reshje të dendura bore dhe erë të fortë shkaktohen nga përplasja e ajrit shumë i ftohtë me lagështinë që vjen nga deti. Kjo përplasje krijon stuhi dhe reshje intensive bore.

SMHI ka lëshuar një paralajmërim portokalli për disa pjesë të Svealand-it verior dhe lindor. Në këto zona priten edhe dy deri në katër decimetra borë shtesë, ndërsa në disa vende sasia e borës mund të jetë edhe më e madhe.

Përveç kësaj, paralajmërime të verdha janë në fuqi për bregdetin lindor, nga Kalmar në jug deri në Umeå në veri.

Autoritetet u bëjnë thirrje qytetarëve që të tregojnë kujdes të shtuar dhe të shmangin udhëtimet e panevojshme.

“Mos dilni në trafik pa qenë e nevojshme”, thotë meteorologu i SMHI-së, Toni Fuentes, për gazetën Expressen.

Autoritetet theksojnë se respektimi i paralajmërimeve është i rëndësishëm për sigurinë e të gjithëve.