Socialdemokratët kërkojnë kufi moshe 15 vjeç dhe verifikim me ID për rrjetet sociale

Partia Socialdemokrate (S) në Suedi ka propozuar një ligj të ri që do të vendosë kufi moshe prej 15 vjetësh për përdorimin e rrjeteve sociale. Përdoruesit do të duhet të verifikohen me një dokument identiteti për të hyrë në platformat online.

Lajmi u bë i ditur nga kryetarja e partisë, Magdalena Andersson, në një konferencë për shtyp. Ajo tha se rrjetet sociale po dëmtojnë gjumin e të rinjve, po përkeqësojnë rezultatet në shkollë dhe po krijojnë ideale të rreme për pamjen dhe jetën.

Sipas Andersson, një problem i madh është se fëmijët po rekrutohen nga bandat kriminale përmes rrjeteve sociale, ku gjithashtu përhapet urrejtje dhe ide ekstremiste.

Ajo krahasoi ndikimin e rrjeteve sociale me varësinë nga cigaria dhe alkooli, duke thënë:

“Të mos bëjmë asgjë për këtë, do të thotë të tradhtojmë një brez të tërë.”

Socialdemokratët propozojnë gjithashtu krijimin e një njësie të veçantë policësh të internetit, që do të patrullojnë në rrjetet sociale në të njëjtën mënyrë si policët që patrullojnë rrugët, për të ndaluar abuzimet, urrejtjen dhe rekrutimin e të miturve në krim.