Socialdemokratët: Suedia duhet të përfshihet në “murin e dronëve” të Europës

Partia Socialdemokrate kërkon që Suedia të bëhet pjesë e bashkëpunimit të ri të Bashkimit Evropian për mbrojtjen kundër dronëve. Kryetarja e partisë, Magdalena Andersson, tha se Suedia duhet të marrë një rol aktiv në këtë projekt.

“Mendoj se Suedia duhet të jetë një pjesë aktive në këtë”, u shpreh Andersson para se të hynte në një takim mbi sigurinë me të gjithë krerët e partive në parlament.

Deri tani, vetëm disa vende kanë marrë pjesë në bisedimet për krijimin e një “muri dronësh”, kryesisht shtete që kanë kufi tokësor me Rusinë ose Bjellorusinë.

“Ne nuk morëm pjesë në takimin që u mbajt të premten dhe mendoj se qeveria duhet të sigurojë që Suedia të jetë e përfshirë. Ne kemi Rusinë si fqinjin më të afërt në anën tjetër të Detit Baltik”, tha Andersson.

Takimi është thirrur nga kryeministri Ulf Kristersson pas shkeljeve të fundit të hapësirës ajrore në disa vende të Evropës. Para takimit, Kristersson bëri të ditur se Suedia po ndihmon Danimarkën me trupa ushtarake dhe pajisje kundër dronëve për të rritur sigurinë gjatë samitit të BE-së që zhvillohet këtë javë në Kopenhagen.