Sondazhi: Liberalët bien në 1,4%, Socialdemokratët kryesojnë me 35,4%, SD 21,4%, Moderatët 18,9%.

Partia Liberale (Liberalerna) vazhdon rënien e saj dhe ka arritur në vetëm 1,4% të mbështetjes së votuesve. Këtë e tregon një sondazh i ri i opinionit i kryer nga Indikator Opinion me porosi të radios publike suedeze Ekot.

Ky është rezultati më i ulët ndonjëherë për një parti të konsoliduar parlamentare në një sondazh opinioni në Suedi.

“ Këto janë shifra vërtet katastrofike për Liberalët, thotë Per Oleskog Tryggvason, shef i analizës së opinionit në Indikator Opinion”, për Ekot.

Sipas tij, një nga arsyet e këtij rezultati rekord të ulët mund të jetë situata ndërkombëtare, e cila e ka bërë të vështirë për kryetaren e re të partisë, Simona Mohamsson, të jetë më e dukshme në opinionin publik.

Sondazhi tregon gjithashtu se Kristian Demokratët (KD) janë nën pragun zgjedhor prej 4%, me 3,9%. Partia e Qendrës (C), e cila më parë ishte nën prag, ka shënuar rritje dhe tani ka 5,3% të mbështetjes.

Ndërkohë, Socialdemokratët (S) vazhdojnë të jenë partia më e madhe në vend me 35,4%, të ndjekur nga Demokratët e Suedisë (SD) me 21,4% dhe Moderatët (M) me 18,9%.

Rezultatet e plota të sondazhit (në përqindje):

• Socialdemokratët (S): 35,4 (+0,2)
• Demokratët e Suedisë (SD): 21,4 (0,0)
• Moderatët (M): 18,9 (+0,5)
• Partia e Majtë (V): 7,5 (+0,4)
• Partia e Qendrës (C): 5,3 (+1,5)
• Partia e Gjelbër (MP): 4,7 (-1,7)
• Kristian Demokratët (KD): 3,9 (0,0)
• Liberalët (L): 1,4 (-0,7)

Si u krye sondazhi

Sondazhi u realizua nga Indikator Opinion për Ekot. Ai u zhvillua në periudhën 11–25 janar 2026 dhe iu drejtua një përzgjedhjeje të rastësishme prej 4 349 qytetarësh suedezë mbi moshën 18 vjeç, me të drejtë vote.

Në total u mblodhën 1 828 përgjigje, që përfaqëson një normë përgjigjeje prej 42%. Pyetja kryesore ishte:

“Cilën parti do të votonit nëse zgjedhjet parlamentare do të mbaheshin sot?”

Ata që nuk mundën ose nuk dëshironin të tregonin synimin e tyre të votës, u pyetën se cilën parti e pëlqejnë më shumë.

Burimi: sverigesradio

Link: https://www.sverigesradio.se/artikel/ny-bottennotering-for-l-1-4-procent