Sot prezantohet “Ligji i denoncimit” – priten vendime të rëndësishme

Detajet për të ashtuquajturin “ligji i denoncimit” do të publikohen sot, kur grupi i ekspertëve t’i dorëzojë propozimet e tij ministrit të Emigracionit, Johan Forssell (M). Ligji i propozuar nga partitë e marrëveshjes Tidö kërkon që punonjësit e komunave dhe institucioneve shtetërore të jenë të detyruar të raportojnë në polici ose në Agjencinë e Emigracionit personat që jetojnë në Suedi pa leje qëndrimi.

Por ligji ka shkaktuar përçarje të thella, edhe brenda vetë partive të marrëveshjes Tidö. Partia Sverigedemokraterna (SD) mbështet fuqishëm propozimin, ndërsa Partia Liberale (L) kërkon përjashtime dhe një qasje më të butë. Sipas një vendimi nga kongresi i saj, L propozon që institucionet arsimore, shëndetësore, biblioteket dhe disa shërbime sociale të mos përfshihen në këtë ligj. Gjithashtu, ata argumentojnë se nuk duhet të ketë ndëshkime për ata punonjës që nuk raportojnë rastet.

Ekspertët që po përgatisin ligjin pritet të japin sot detaje mbi grupet që mund të përjashtohen nga detyrimi për denoncim dhe mbi pasojat që mund të ketë për ata që nuk e zbatojnë ligjin.

Propozimet do të prezantohen publikisht në orën 10:00 dhe pritet të nxisin debate të mëtejshme mbi mënyrën e zbatimit të ligjit dhe ndikimin e tij në jetën e përditshme të qytetarëve.