Studentëve në Pakistan u ofrohen dokumente të rreme për të punuar në Suedi

Një investigim i televizionit suedez SVT Nyheter Väst tregon se studentëve në Pakistan u ofrohen dokumente të rreme për të marrë leje qëndrimi në Suedi. Qëllimi nuk është studimi, por puna në Suedi.

Gazetarët e SVT-së, duke përdorur kamera të fshehta, kanë zbuluar se dy agjenci rekrutimi në Pakistan, të cilat paguhen nga universitete suedeze, u kërkojnë studentëve të dorëzojnë dokumente bankare të falsifikuara për të marrë vizë studentore.

Sipas agjencive, plani është që studentët të pranohen fillimisht si studentë në Suedi, më pas të ndërpresin studimet dhe të qëndrojnë në vend për të punuar pa pengesa.

Një nga rekrutuesit thotë se:

“90% e studentëve tanë nuk studiojnë”.

Gjatë viteve të fundit, tre universitete në Suedinë Perëndimore kanë paguar më shumë se dhjetë milionë korona suedeze për kompani të ndryshme që merren me rekrutimin e studentëve ndërkombëtarë për në Suedi.

Përmasat e këtij mashtrimi kanë shkaktuar kritika nga universitetet suedeze, ndërsa Agjencia Suedeze e Migracionit thekson se personat që nuk kanë për qëllim të studiojnë nuk duhet të marrin vizë studentore.

“Ne shohim se ka një keqpërdorim”, thotë Oskar Lindblad nga Agjencia Suedeze e Migracionit.

Burimi: SVT

Link: https://www.svtplay.se/video/eDmY1R9/studentparadiset

https://www.svt.se/nyheter/lokalt/vast/sa-svarar-agenturen-om-de-fejkade-bankkontoutdragen

https://www.svt.se/nyheter/lokalt/vast/har-erbjuds-studenter-i-pakistan-falska-bankutdrag-for-att-ta-sig-till-sverige