Studim i ri hedh poshtë mitet mbi rënien e lindshmërisë në Suedi

Një studim i ri po tregon se pretendimi se lindjet e ulëta në Suedi vijnë nga fakti që gratë janë më të arsimuara se burrat dhe për këtë arsye e kanë më të vështirë të gjejnë partner, është një mit që nuk qëndron. Këtë e shkruan agjencia suedeze e lajmeve TT.

Sipas studiuesit Glenn Sandström, docent në demografi historike, në të kaluarën gratë me status të lartë shoqëror dhe arsim të lartë kishin më pak gjasa të bëheshin nëna sesa ato me më pak arsim. Por ky model ndryshoi që në vitet 1990, dhe sot ndodh e kundërta.

“Gratë e arsimuara dhe me pozitë të mirë ekonomike kanë më shumë gjasa të bëhen me fëmijë sesa gratë me arsim të ulët”, tha Sandström për TT.

Ai gjithashtu thekson se edhe pretendimi se lindshmëria e ulët vjen nga mungesa e qëndrueshmërisë në marrëdhënie nuk është i vërtetë.

Ky studim po sfidon disa prej shpjegimeve më të përhapura për rënien e lindjeve në Suedi, duke treguar se faktorët janë më kompleksë sesa mendohej më parë.