Studim: Orari më i shkurtër i punës përmirëson shëndetin dhe mirëqenien

Punonjësit që punojnë 32 orë në javë, në vend të 40 orëve, ndihen më mirë si fizikisht ashtu edhe mendërisht. Përveç kësaj, përmirësohet edhe aftësia e tyre për të punuar, sipas një studimi të ri të publikuar në revistën Nature Human Behaviour.

Pothuajse 2,900 persona nga mbi 100 vende pune në gjashtë shtete të ndryshme morën pjesë në studim. Ata vlerësuan gjendjen e tyre përpara, gjatë dhe një vit pas shkurtimit të orarit të punës. Rezultatet u krahasuan me një grup kontrolli prej 285 personash që vazhduan të punonin 40 orë në javë.

Studimi është i veçantë për shkak të numrit të madh të pjesëmarrësve dhe kohëzgjatjes së tij, thotë Lena Lid Falkman, kërkuese në Shkollën Ekonomike të Stokholmit dhe Universitetin e Karlstadit, për gazetën Arbetet.

“Nëse efektet mbeten edhe pas një kohe të gjatë, atëherë janë më të qëndrueshme. Ky studim tregon qartë se orari më i shkurtër i punës ndikon pozitivisht në mirëqenien, por gjithashtu se punonjësit ndihen se punojnë më mirë”, thekson ajo.