Studimi i ri: Fëmijët e vegjël në Suedi konsumojnë shumë mish dhe pak perime

Një studim i fundit nga Agjencia Suedeze e Ushqimit ka zbuluar se fëmijët e vegjël konsumojnë sasi të larta të mishit të kuq dhe produkteve të përpunuara të mishit, ndërsa dietat e tyre përmbajnë shumë pak fruta dhe perime. Gjetjet kanë ngjallur shqetësim për ndikimin afatgjatë të këtyre zakoneve në shëndetin e tyre.

Sipas studimit, pothuajse gjysma e fëmijëve 1,5 vjeçarë dhe 65% e katërvjeçarëve konsumojnë më shumë se 350 gram mish të kuq dhe produkte të përpunuara mishi në javë, një nivel që tejkalon rekomandimet e ekspertëve.

Dietologia Lotta Moraeus, e cila ka komentuar për SVT, thekson se kjo është një situatë “shqetësuese”, pasi studime të mëparshme kanë treguar një lidhje midis konsumit të lartë të mishit të kuq dhe rrezikut për t’u prekur nga kanceri i zorrës së trashë.

Në anën tjetër, raporti vë në dukje se më pak se një në dhjetë fëmijë katërvjeçarë arrijnë të përmbushin rekomandimin e përditshëm për 400 gram fruta dhe perime. Gjithashtu, gjysma e katërvjeçarëve konsumojnë sasi më të mëdha sheqeri, yndyrë dhe kripë sesa rekomandohet.

Megjithatë, Agjencia Suedeze e Ushqimit vë në dukje disa përmirësime krahasuar me dy dekada më parë, duke theksuar se zakonet ushqimore të fëmijëve të vegjël janë në një tendencë pozitive, megjithëse ende mbetet shumë për t’u bërë.

Ndërkohë që disa përparime janë bërë në zakonet ushqimore të fëmijëve suedezë, studimi thekson nevojën urgjente për një qasje më të balancuar ndaj ushqimit, me më shumë përfshirje të frutave dhe perimeve në dietën e tyre të përditshme.