Studiuesja: Integrimi kërkon më shumë se vetëm kohë në Suedi

Një në pesë emigrantë që kanë jetuar në Suedi për më shumë se 20 vjet nuk kanë pasur kurrë një punë. Në popullsinë shumicë në Suedi, kjo shifër është 7%.

Të dhënat tregojnë se vetëm kalimi i kohës në Suedi nuk mjafton për të siguruar integrimin. Kështu shkruan Bi Puranen, drejtuese e kërkimeve në World Values Survey, në një artikull të publikuar në rubrikën e debatit të gazetës Dagens Nyheter (DN Debatt).

Sipas Puranen, integrimi duhet të mbështetet me masa konkrete që i ndihmojnë emigrantët të bëhen pjesë aktive e shoqërisë suedeze.

Ajo thekson se mësimi i gjuhës suedeze përmes SFI-së duhet të shoqërohet me orientim konkret për jetën dhe shoqërinë në Suedi. Ky orientim, sipas saj, duhet të përfshijë njohuri për jetën e punës, barazinë gjinore, të drejtat e fëmijëve, marrëdhëniet, lirinë fetare dhe të drejtat ligjore të individit.

Puranen argumenton se një person mund të jetojë për shumë vite në Suedi, por kjo nuk do të thotë automatikisht se është integruar në shoqëri. Për integrim nevojiten mundësi reale për të marrë pjesë në jetën shoqërore, për të krijuar kontakte dhe për të pasur takime me njerëz të tjerë.

“Integrimi nuk ndodh vetvetiu ai formësohet nga mundësitë për pjesëmarrje që krijon shoqëria. Koha në Suedi është e rëndësishme. Por integrimi kërkon pjesëmarrje, kontakte dhe takime reale”, shkruan Bi Puranen.

Sipas saj, kjo tregon se politikat e integrimit duhet të shkojnë përtej mësimit të gjuhës dhe të krijojnë më shumë mundësi që migrantët të hyjnë në tregun e punës dhe të marrin pjesë në jetën e përditshme të shoqërisë suedeze.

Burimi: DN

Link: https://www.dn.se/debatt/manga-ar-i-sverige-racker-inte-for-att-bli-integrerad/