Stuhia Boelo pritet të godasë Suedinë, paralajmërohen përmbytje dhe ndërprerje të trenave

Stuhia Boelo pritet të përfshijë Suedinë të dielën, duke sjellë erëra të forta, rrezik për përmbytje dhe ndërprerje të qarkullimit të trenave në disa linja hekurudhore.

Instituti Suedez i Meteorologjisë dhe Hidrologjisë (SMHI) ka lëshuar paralajmërim të verdhë për motin në të gjithë bregdetin perëndimor dhe jugor, si dhe përgjatë bregdetit lindor deri në Stokholm. Paralajmërimi përfshin edhe ishujt Öland dhe Gotland.

Meteorologu i televizionit suedez SVT, Nils Holmqvist, thotë se erërat e forta pritet të godasin zonat bregdetare në jug të vendit.

”Erërat të forta në formë stuhie pritet të përfshijnë zonat bregdetare në jug të Suedisë. Kjo duhet të merret parasysh nga të gjithë ata që planifikojnë të dalin jashtë”, deklaroi Holmqvist.

Përveç erërave të forta, për bregdetin perëndimor është lëshuar edhe një paralajmërim për rrezik përmbytjesh. Një nga zonat që pritet të preket më shumë nga stuhia është bregdeti jugor i rajonit Skåne.

Ndërprerje të qarkullimit të trenave

Për shkak të motit të keq, do të ketë ndërprerje të qarkullimit të trenave në dy linja hekurudhore.

Në linjën Kristianstad–Karlskrona, trenat nuk do të qarkullojnë nga ora 03:00 deri në orën 15:00 të së dielës.

Ndërsa në linjën Karlskrona–Emmaboda, qarkullimi i trenave do të ndërpritet nga ora 05:42 deri në orën 13:42.

Paralajmërim për rrezik në rrugë

SMHI paralajmëron se erërat e forta mund të rrëzojnë pemë dhe degë, duke bllokuar rrugët dhe duke vështirësuar qarkullimin.

Instituti u rekomandon qytetarëve që të tregojnë kujdes nëse planifikojnë të dalin jashtë gjatë stuhisë. Gjithashtu, këshillohet që të gjitha objektet e lëvizshme që ndodhen jashtë të sigurohen mirë, në mënyrë që të mos merren nga era dhe të mos shkaktojnë dëme.

Autoritetet u bëjnë thirrje qytetarëve të marrin parasysh paralajmërimet për motin e keq dhe të tregojnë kujdes të shtuar, veçanërisht në zonat bregdetare ku priten erëra të forta dhe rrezik për përmbytje.

Burimi: SMHI/SVT

Link: https://www.smhi.se/vader/prognoser-och-varningar/varningar-och-meddelanden/varningar

https://www.svt.se/nyheter/lokalt/skane/kraftiga-vindar-och-regn-vantas-over-skane