Suedezët ndër popujt më të lumtur në botë – Ruajnë vendin e katërt

Suedia vazhdon të jetë një nga vendet më të lumtura në botë, duke ruajtur vendin e katërt në raportin e sponsorizuar nga OKB, “World Happiness Report”. Ky raport, i publikuar së fundmi nga TT, konfirmon se Suedezët vazhdojnë të shijojnë një cilësi të lartë të jetës dhe mirëqenie të qëndrueshme.

Ndërkohë, Finlanda mbetet padiskutim populli më i lumtur në botë për tetë vite radhazi, duke kryesuar raportin. Pas saj renditen Danimarka në vendin e dytë dhe Islanda në vendin e tretë.

Nga ana tjetër, Norvegjia është i vetmi vend nordik që nuk arrin të hyjë në pesëshen më të lumtur, duke u renditur në vendin e shtatë.

— “Vendet nordike vazhdojnë të përfitojnë nga sisteme të kujdesit shëndetësor, arsim dhe mbështetje sociale të aksesueshme dhe me cilësi të lartë,” thotë Ilana Ron-Levey, drejtoreshë ekzekutive e kompanisë që realizoi studimin, për CNN.

Raporti thekson se modeli nordik i shërbimeve publike gjithëpërfshirëse dhe mbështetjes sociale të fortë është faktori kryesor që kontribuon në lumturinë e lartë të këtyre vendeve. Ndërsa vendet e tjera përballen me sfida ekonomike dhe sociale, vendet nordike vazhdojnë të mbajnë një nivel të qëndrueshëm të mirëqenies dhe lumturisë.