Suedezët po kursejnë më shumë – largohen nga aksionet dhe fondet

Pasiguria në botë po ndikon tek mënyra si suedezët ruajnë paratë e tyre. Shumë prej tyre po largohen nga investimet në aksione dhe fonde, dhe po i vendosin kursimet në llogari të sigurta në bankë.

Eksperti i bankës SEB, Américo Fernández, thotë për gazetën Dagens Industri se situata globale është shumë e paqëndrueshme dhe kjo i bën njerëzit më të kujdesshëm me paratë.

Rënia e tregjeve amerikane, si dhe shqetësimet për çështje tregtare dhe ushtarake, janë disa nga arsyet që po ndikojnë në këtë ndryshim.

Sipas një sondazhi të bankës SEB, suedezët do të vazhdojnë të preferojnë llogaritë e kursimit për të paktën gjashtë muajt e ardhshëm.