Suedezët po ushqehen gjithnjë e më keq – burrat dhe të rinjtë në krye të listës

Zakonet ushqimore të suedezëve vazhdojnë të përkeqësohen, me burrat dhe të rinjtë që hanë më keq se të gjithë. Një tjetër tendencë shqetësuese është se gratë e reja, të cilat më parë ushqeheshin më shëndetshëm, kanë përjetuar ndryshimin më negativ në zakonet e tyre ushqimore.

Këto janë rezultatet e anketës së shëndetit publik 2024 nga Agjencia Suedeze e Shëndetit Publik, e cila konfirmon një prirje në rënie të ushqyerjes së shëndetshme që nga viti 2016.

Më pak peshk, më shumë pije të gazuar

Krahasuar me anketën e vitit 2022, përqindja e atyre që hanë peshk të paktën dy herë në javë ka rënë me 5.4 pikë përqindjeje. Në të njëjtën kohë, konsumi i pijeve të gazuara ka shënuar rritje me 3.5 pikë përqindjeje.

Në përgjithësi, gratë vazhdojnë të ushqehen më mirë se burrat, veçanërisht për sa i përket konsumit të frutave, manave, perimeve. Megjithatë, gratë e reja (16–29 vjeç) kanë shënuar rënien më të madhe, me një rritje prej mbi 10 pikë përqindjeje të atyre që konsumojnë pije të gazuara të paktën dy herë në javë.

“Ata që më parë ushqeheshin më shëndetshëm duket se kanë përkeqësuar më shumë zakonet e tyre, gjë që ka ulur dallimet midis grupeve. Për shembull, të rinjtë – si meshkuj ashtu edhe femra – tani konsumojnë pije të gazuara në pothuajse të njëjtën masë”, thotë Pia Lindeskog, eksperte pranë Agjencisë Suedeze të Shëndetit Publik.

Të rinjtë dhe shtresat më të rrezikuara ushqehen më keq

Sipas anketës, grupet që ushqehen më keq janë burrat, të rinjtë (16–29 vjeç), personat me arsim më të ulët dhe ata që përballen me vështirësi ekonomike.

Një dietë e pashëndetshme është një faktor kryesor rreziku për diabetin, sëmundjet kardiovaskulare dhe disa lloje të kancerit.

Anketa e vitit 2024 përfshiu më shumë se 17,600 persona, me një shkallë përgjigjeje prej 39.4%.

Burimi: Aftonbladet