Suedi: 18 mijë korona gjobë për 165 km/h në autostradë. Ja rregullat e shpejtësisë?

Një i ri suedez është dënuar me 18 000 korona gjobë pasi u kap nga policia duke ecur me 165 kilometra në orë në autostradë pranë Västerås. Ai vetë thotë se nuk po ecte aq shpejt.

“ E shtova shpejtësinë që shoku im të arrinte trenin, por nuk kam kaluar 140 kilometra në orë”, ka deklaruar ai në polici.

Policia e mati shpejtësinë me metodën e saj të zakonshme dhe gjykata e shkallës së parë i besoi këtij vlerësimi. Si pasojë, i riu u dënua me 18 000 korona gjobë.

Nuk u dënua vetëm për shpejtësi

Zakonisht, tejkalimi i shpejtësisë dënohet me maksimum 4 000 korona gjobë të menjëhershme. Nëse dikush ecën më shumë se 30 km/h mbi kufirin e lejuar, policia mund t’ia marrë patentën në vend. Më pas është Transportstyrelsen që vendos nëse dhe për sa kohë do të qëndrojë e hequr.

Por në këtë rast, i riu nuk u dënua thjesht për tejkalim shpejtësie. Ai u shpall fajtor për veprën më të rëndë “drejtim i pakujdesshëm në trafik”.

“Drejtimi i pakujdesshëm është vepër më e rëndë se tejkalimi i shpejtësisë. Kur ka një vepër më të rëndë, ajo e përfshin shkeljen më të lehtë”, shpjegon polici i trafikut Petter Magnusson.

Gjykata vlerësoi se 165 km/h nuk ishte thjesht shkelje e zakonshme, por rrezikonte edhe përdoruesit e tjerë të rrugës. Për këtë arsye ai u dënua për veprën më të rëndë.

Megjithatë, sipas Magnusson, jo çdo rast me 165 km/h do të konsiderohej automatikisht drejtim i pakujdesshëm. Rrethanat kanë rëndësi.

“ Nëse do të ndaloja dikë në mes të natës që po ecte kaq shpejt, nuk do ta raportoja për drejtim të pakujdesshëm”, thotë ai.

Kur shpejtësia bëhet krim më i rëndë?

Sipas ligjit suedez për disa vepra penale në trafik (neni 1), tejkalimi i shpejtësisë konsiderohet “drejtim i pakujdesshëm” kur shoferi tregon mungesë të madhe kujdesi. Kjo zakonisht ndodh kur shpejtësia tejkalohet me më shumë se 30 km/h (ose mbi 20 km/h në zonat me kufi 30 km/h), ose kur bëhen manovra të rrezikshme.

Shpejtësia shumë e lartë, drejtimi pranë shkollave, vendkalimeve për këmbësorë ose në zona me trafik të dendur, si dhe marrja e rreziqeve me vetëdije, e rëndojnë çështjen. Në raste të tilla, dënimi mund të jetë deri në 40 gjoba ditore, heqje patente dhe në raste shumë të rënda edhe burg.

Patenta do t’i hiqet

Përveç gjobës 18 000 korona, shoferi do të hetohet edhe nga Transportstyrelsen. Patenta e tij do të hiqet dhe autoriteti do të vendosë për sa kohë. Nëse ai ka shkelje të mëparshme, kjo mund të ndikojë negativisht në vendim.

Ai nuk u dënua veçmas për tejkalim shpejtësie, sepse vepra më e rëndë, drejtimi i pakujdesshëm e përfshin atë.

“ Kur ka dy vepra, dënohesh për atë më të rëndën”, përfundon Petter Magnusson.

Burimi: Carup

Link: https://carup.se/da-far-du-bota-18-000-kr-for-fortkorningen/#google_vignette