Suedi drejt ligjit të ri për paranë cash, mund të hyjë në fuqi më 1 qershor 2026.

Suedia mund të marrë së shpejti një ligj të ri për përdorimin e parasë cash. Vendi është ndër më të dixhitalizuarit në botë dhe sot paraja fizike përdoret shumë pak. Nëntë nga dhjetë blerje bëhen me kartë bankare ose me Swish, dhe bankomatet janë gjithnjë e më të rralla.

Megjithatë, një sondazh i kryer këtë pranverë nga Bankomat tregon se 83% e suedezëve duan që paratë cash të vazhdojnë të ekzistojnë edhe në të ardhmen.

Para gati dy vitesh, qeveria nisi një hetim të posaçëm për përdorimin e parasë cash, me kërkesë të Finansinspektionen. Ky hetim u prezantua në dhjetor 2024 dhe që atëherë ka qenë në proces konsultimi publik.

Përdorimi i parasë cash në rënie të vazhdueshme

Sipas Riksbank, në vitin 2024 vlera e kartëmonedhave dhe monedhave në qarkullim në Suedi ishte rreth 57 miliardë krona.

Por tërheqjet nga bankomatet kanë rënë çdo vit:

• 2018: 108 milionë krona
• 2019: 87 milionë krona
• 2020: 65 milionë krona
• 2021: 58 milionë krona
• 2022: 57 milionë krona
• 2023: 50 milionë krona
• 2024: 46 milionë krona
  Burimi: Sveriges Riksbank

Tashmë qeveria propozon rregulla të reja për paratë cash

Qeveria ka dërguar një propozim të ri ligjor në Lagråd, i cili tani duhet të kontrollojë nëse ligji i propozuar përputhet me kushtetutën dhe ligjet e tjera. Vetëm pas miratimit të Lagrådit, qeveria mund t’ia dërgojë ligjin parlamentit.

Në propozim thuhet:

“Përdorimi i parasë cash vazhdon të bjerë, por është e rëndësishme të ruhet funksioni i saj si mjet pagese. Kjo është veçanërisht e rëndësishme për mallra dhe shërbime që lidhen me nevojat më bazike.”

Katër pikat kryesore të ligjit të ri

1. Dyqanet ushqimore dhe farmacitë duhet të pranojnë para cash

Të gjitha supermarketet dhe farmacitë që kanë kasa me personel do të jenë të detyruara të pranojnë pagesa në para cash.

2. Përjashtim kur rrezikohet siguria e stafit

Detyrimi nuk do të zbatohet nëse pranimi i parasë cash krijon rrezik për sigurinë e punonjësve, nëse biznesi rrezikon të mbyllet ose në raste të veçanta kur ka arsye të forta për të mos pranuar pagesë cash.

3. Duhet të jetë e mundur të depozitohen para cash në të gjithë vendin

Konsumatorët duhet të kenë mundësi të kryejnë depozita cash në mënyrë të qëndrueshme, kudo në vend.

4. Shërbime të përshtatshme për bizneset

Bizneset duhet të kenë akses në shërbime që u mundësojnë menaxhim të sigurt të parasë  dhe depozitimin e arkës ditore.

Sipas planit, ligji i ri pritet të hyjë në fuqi më 1 korrik 2026.

Burimi: Nyheter24