Suedi: Patatet e para të reja dalin në treg, çmimi arrin rreth 300 korona për kilogram.

Ka nisur korrja e patateve të para të reja për këtë vit në Torekov të Suedisë. Sipas një njoftimi për shtyp nga rrjeti i marketeve Coop, patatet e para do të mbërrijnë në disa dyqane të përzgjedhura që të mërkurën.

Sasitë e vogla të prodhimit në fillim të sezonit kanë bërë që çmimi të jetë shumë i lartë. Patatet e reja pritet të shiten me një çmim rreth 300 korona për kilogram.

Coop thotë se ky çmim është normal për dërgesat e para të sezonit, pasi në këtë periudhë prodhimi është ende i kufizuar.

Në njoftim thuhet gjithashtu se kushtet e mira të motit gjatë pranverës kanë ndikuar pozitivisht në zhvillimin e prodhimit të këtij viti.

“Pas një pranvere të favorshme me kushte të mira për kultivim, korrja e këtij viti është zhvilluar mirë”, shkruan Coop në deklaratën e saj.

Burimi: Coop

Link: https://pressrum.coop.se/arets-forsta-svenska-farskpotatis-landar-hos-coop/