Suedi pezullon trajtimin e azilit për sirianët

Migrationsverket ka njoftuar pezullimin e përkohshëm të trajtimit të aplikimeve për azil nga shtetasit sirianë, për shkak të situatës së paqartë në vendin e tyre të origjinës. Vendimi është bërë publik në një deklaratë zyrtare të agjencisë.

“Duke pasur parasysh situatën aktuale, nuk është e mundur të vlerësohen arsyet për mbrojtje në këtë moment,” tha Carl Bexelius, drejtori juridik i Migrationsverket.

Gjatë kësaj periudhe pezullimi, nuk do të jepen leje qëndrimi dhe as nuk do të ekzekutohen vendime dëbimi për shtetasit sirianë.

Kufizim i përkohshëm

Nuk është specifikuar kohëzgjatja e pezullimit, por Migrationsverket ka theksuar se masa të tilla janë të përkohshme. Për krahasim, agjencia përmendi rastin e Afganistanit në vitin 2021, kur Suedia pezulloi trajtimin e rasteve të azilit pas marrjes së pushtetit nga talebanët.

Ky vendim pritet të ngjallë reagime në opinionin publik dhe në skenën politike, ndërsa çështjet e migracionit mbeten një temë e diskutueshme në Suedi.