Suedia nuk është më zgjedhja kryesore për finlandezët që duan të punojnë jashtë vëndit.

Rreth 2 000 persona shpërngulen çdo vit nga Finlanda në Suedi. Shumica e tyre shkojnë për të studiuar, por për finlandezët që duan të punojnë jashtë vendit, Suedia nuk është më vendi më i preferuar.

Sipas të dhënave për vitin 2024, gjithsej 16 914 persona u larguan nga Finlanda drejt vendeve të tjera. Nga këta, 2 221 persona u shpërngulën në Suedi, duke e bërë atë ende destinacionin më të zakonshëm për finlandezët që emigrojnë. Pjesa më e madhe e tyre janë të rinj të moshës 15–24 dhe 25–30 vjeç.

“Grupi më i madh janë studentët”, thotë Heli Mäkipää, përgjegjëse projekti në shërbimin këshillimor Info Norden.

Një arsye tjetër e rëndësishme pse finlandezët largohen nga vendi është kërkimi i punës. Sipas Mäkipää, kur njerëzit nuk gjejnë punë në Finlandë, ata fillojnë të kërkojnë mundësi jashtë vendit.

Megjithatë, ndryshimet që solli pandemia e koronavirusit kanë ndikuar në këtë trend. Falë zhvillimeve digjitale, sot është më e lehtë të punosh për një vend tjetër pa u shpërngulur përgjithmonë.

“Mund të kesh një punë në një vend, një punë tjetër në një vend tjetër, familjen në një vend të tretë dhe një shtëpi pushimi në një të katërt”, shpjegon ajo.

Megjithëse situata ekonomike në Finlandë aktualisht është më e dobët se në Suedi, një valë e madhe emigrimi si ajo e viteve 1960–1970 nuk pritet të ndodhë përsëri. Në atë kohë, rreth 40 000 persona në vit largoheshin nga Finlanda drejt Suedisë.

“Një situatë e tillë nuk është realiste sot. Globalizimi ka bërë që vendet nordike të funksionojnë si një treg i përbashkët”, thotë Mäkipää.

Megjithatë, mund të ketë lëvizje më të vogla të popullsisë në disa zona të caktuara. Në veri të Suedisë po zhvillohen investime të mëdha industriale që pritet të krijojnë dhjetëra mijëra vende pune, ndërsa në Laplandën finlandeze papunësia mbetet e lartë. Kjo mund të çojë në një rritje të vogël të shpërnguljes në këtë rajon.

Sipas statistikave nga shërbimi Info Pohjola, Suedia nuk është më vendi që tërheq më shumë finlandezët që duan të punojnë jashtë vendit.

Burimi: SVT

Link: https://www.svt.se/nyheter/uutiset/svenska/sverige-inte-langre-favorit-for-finlandare-som-vill-jobba-utomlands