Suedia përjashton disa profesione të kujdesit shëndetësor nga kërkesa e re për pagën minimale

Partitë që qëndrojnë pas Marrëveshjes Tidö kanë arritur një marrëveshje që ndihmësinfermierët, kujdestarët e pacientëve (vårdbiträden) dhe punonjësit e ambulancës të përjashtohen nga kërkesa e re për pagën minimale që vlen për personat që vijnë në Suedi për të punuar.

Lajmi është bërë publik përmes një artikulli të botuar në gazetën Aftonbladet nga përfaqësues të katër partive që mbështesin qeverinë.

Qeveria suedeze dhe Demokratët e Suedisë (SD) kishin vendosur më herët që paga minimale për emigracionin e punës të rritet nga 80% në 90% të pagës mediane në vend. Ky ndryshim hyn në fuqi më 1 qershor 2026 dhe do të thotë se një person që vjen në Suedi me leje pune duhet të ketë një pagë mujore prej të paktën 33.390 koronash suedeze.

Kur u prezantua ky rregull i ri, qeveria njoftoi gjithashtu se disa profesione mund të përjashtoheshin nga kjo kërkesë. Më herët, televizioni suedez SVT raportoi se përjashtimi do të përfshinte ndihmësinfermierët dhe kujdestarët e pacientëve. Sipas raportimeve, negociatat për këtë çështje kanë qenë të vështira dhe janë diskutuar deri në nivelin e drejtuesve të partive.

Tani është konfirmuar se edhe punonjësit e ambulancës do të përfitojnë nga ky përjashtim.

Për këto profesione, paga minimale nuk do të jetë 90% e pagës mediane, por 75%, që përkthehet në pak më shumë se 27.000 krona suedeze në muaj.

Ministri suedez i Migracionit, Johan Forssell, tha gjatë një konference për shtyp të premten se këto profesione janë shumë të rëndësishme për shoqërinë suedeze dhe se aktualisht ka mungesë të punonjësve të kualifikuar në këto fusha.

“Ka profesione ku mungojnë punonjësit dhe që kanë një rol shumë të rëndësishëm në shoqëri. Aktualisht nuk kemi mjaftueshëm personel me kompetencat e nevojshme. Pikërisht për këtë arsye qeveria ka vendosur të bëjë këto përjashtime”, tha ai.

Sipas qeverisë, në total 27 profesione do të përjashtohen nga kërkesa e re për pagën minimale. Shumica e tyre janë profesione që lidhen me kujdesin shëndetësor dhe mirëqenien sociale.

Në të njëjtën kohë, qeveria ka vendosur që dy profesione të mos kenë më mundësi të marrin leje pune në Suedi, pavarësisht nivelit të pagës që ofrohet. Këto janë:

• Asistentët personalë;
• Mbledhësit e frutave në pyje.

Artikulli i publikuar në Aftonbladet është nënshkruar nga kryeministri Ulf Kristersson, ministrja e Shëndetësisë Elisabet Lann, ministri i Tregut të Punës Johan Britz dhe zëdhënësi për çështjet e migracionit i SD-së, Ludvig Aspling.

Vendimi hyn në fuqi më 1 qershor dhe pritet të ndikojë drejtpërdrejt në mënyrën se si do të jepen lejet e punës për shtetasit e huaj që dëshirojnë të punojnë në Suedi.

Burimi: SVT/Aftonbladet

Link: https://www.svt.se/nyheter/inrikes/svt-erfar-vardbitraden-undantas-fran-lonekrav

https://www.aftonbladet.se/nyheter/a/V64996/yrkena-som-undantas-fran-nya-lonekraven