Suedia prezanton strategjinë e parë kombëtare kundër vetmisë

Qeveria suedeze ka njoftuar krijimin e një strategjie kombëtare për të luftuar vetminë, një problem në rritje që prek qindra mijëra njerëz.

Sipas ministrit të Çështjeve Sociale, Jakob Forssmed (KD), rreth 600,000 persona në Suedi ndihen të vetmuar, ndërsa 8% e popullsisë nuk ka asnjë mik të afërt, sipas të dhënave nga Autoriteti Suedez i Shëndetit Publik. Studimet tregojnë se vetmia lidhet me probleme serioze shëndetësore, si depresioni dhe sëmundje të tjera psikologjike.

– Vetmia është një nga sfidat më të mëdha sociale të kohës sonë, – tha Forssmed gjatë konferencës për shtyp.

Strategjia synon të krijojë më shumë hapësira sociale, të lehtësojë përfshirjen në shoqëri dhe të pakësojë vetminë afatgjatë. Qeveria pritet të prezantojë masa konkrete për zbatimin e saj në muajt në vijim.