Suedia ul sërish taksën e karburantit. Benzina dhe nafta pritet të bëhen 3 krona më të lira për litër

Qeveria suedeze ka njoftuar një paketë të re ekonomike prej 17.5 miliardë kronash suedeze, për shkak të situatës së krijuar nga bllokada e Hormuzit, e cila ka ndikuar në rritjen e çmimeve të energjisë dhe karburantit.

Gjatë një konference për shtyp, partitë e marrëveshjes Tidö bënë të ditur se 7.7 miliardë krona nga kjo paketë do të përdoren për uljen e taksës së karburantit. Sipas planit të qeverisë, nga 1 korriku deri më 30 nëntor, çmimi i benzinës dhe dizelit në pikat e karburantit do të ulet me 3 krona për litër.

Martin Kinnunen nga Demokratët Suedezë tha gjatë konferencës se kjo masë do të ndihmojë familjet dhe qytetarët që varen nga makina për të shkuar në punë.

“Ky vendim do të ndihmojë në zbutjen e kostove për familjet dhe për njerëzit që kanë nevojë për makinën çdo ditë”, u shpreh ai.

Megjithatë, kjo ulje e taksës nuk mund të hyjë menjëherë në fuqi pa miratimin përfundimtar të Këshillit të Ministrave të Bashkimit Europian. European Commission e ka dhënë tashmë miratimin e saj paraprak.

Përveç uljes së çmimit të karburantit, qeveria suedeze ka vendosur të ndajë edhe 1 miliard krona shtesë për zgjerimin e mbështetjes ndaj faturave të energjisë elektrike.

Ministrja suedeze e Energjisë, Ebba Busch, tha se qeveria po vepron shpejt për të mbështetur qytetarët dhe nuk do të presë që situata të përkeqësohet.

“Qeveria nuk do të rrijë duarkryq dhe të reagojë me vonesë. Ne do të jemi në anën e familjeve”, deklaroi ajo.

Deri tani, qeveria ka bërë publike vetëm rreth gjysmën e masave të planifikuara në këtë buxhet shtesë, ndërsa propozimet e tjera ende nuk janë bërë të ditura.

Burimi: Regeringen

Link: https://www.regeringen.se/pressmeddelanden/2026/05/ytterligare-skattesankningar-pa-drivmedel/