Suksesi i shqiptarit në Suedi: Pizzeria që nuk po zgjerohet, edhe miliarderët marrin “Jo”.

Në restorantin e vogël Lilla Napoli në qytetin Falkenberg të Suedisë, dashamirësit e picës duhet të prenotojnë muaj më parë për të siguruar një vend. Pavarësisht këtij suksesi të madh, dy themeluesit Ville Ilola dhe Besmir Balaj nuk kanë aspak në plan të hapin ndonjë degë tjetër.

“Na pyesin shpesh nëse do hapim restorante të tjera. Shumë njerëz të pasur vijnë dhe na ofrojnë para, por ne nuk pranojmë,” thotë Ville Ilola për gazetën Dagens Industri.

Madje edhe biznesmeni i njohur norvegjez Petter Stordalen, i cili ka rrjetin e tij të hoteleve, është refuzuar kur ka dashur të hapë një Lilla Napoli në ambientet e tij.

Për Ville dhe Besmirin, cilësia dhe pasioni për picën janë më të rëndësishme se paratë apo zgjerimi.

“Nuk na intereson të bëhemi të mëdhenj. Na mjafton që bëjmë pica të mira dhe jemi të lumtur,” shprehen ata.

Lilla Napoli është kthyer në një pikë referimi për picën në Suedi, por për themeluesit e saj, suksesi nuk matet me para por me dashurinë për zanatin.