Svenskt Näringsliv: Mos e hiqni zbritjen e ditës së parë të sëmundjes “Karensavdraget”

Svenskt Näringsliv kundërshton propozimin për të hequr karensavdraget, zbritjen financiare që punëtorët marrin ditën e parë kur sëmuren. Zëvendëspresidenti i organizatës, Mattias Dahl, shkruan në SvD Debatt se Suedia e ka provuar tashmë një herë këtë ndryshim dhe rezultatet kanë qenë shumë të këqija.

Ai kujton se në vitin 1987 zbritja e ditës së parë u hoq. Pas kësaj, numri i njerëzve të sëmurë në gjithë vendin u rrit ndjeshëm dhe Suedia u bë një nga vendet me më shumë raportime sëmundjeje në Evropë. Kostot për shtetin u rritën aq shumë, sa që politikanët me një marrëveshje të gjerë vendosën ta rikthenin masën. Sipas Dahl, pas rikthimit të karensavdraget situata filloi të përmirësohej.

Ai nuk pajtohet as me argumentin se është e padrejtë që disa punonjës mund të punojnë nga shtëpia kur janë pak të sëmurë, ndërsa të tjerët duhet të jenë në vendin e punës. Dahl thotë se në Suedi ekzistojnë dallime të mëdha mes profesioneve dhe kjo është një realitet që duhet pranuar.

“Rrethanat janë të ndryshme, në kaq shumë mënyra të ndryshme. Ky nuk është një arsye për të hequr karensavdraget”, shkruan ai.