Swish sjell funksion të ri për kërkesat e pagesave

Aplikacioni suedez Swish ka nisur sot një funksion të ri që do t’u bëjë më të lehta dhe më të këndshme kërkesat për pagesë.

Swish përdoret nga 8,6 milionë persona dhe është i lidhur me numrin e celularit. Ai shërben për të dërguar para shpejt dhe lehtë mes miqsh dhe të afërmish. Prej disa vitesh, përdoruesit kanë mundur të dërgojnë edhe kërkesa për pagesë, por shumë njerëz e kanë shmangur këtë mundësi, sepse mund të krijojë situata të sikletshme.

Për ta ndryshuar këtë, Swish prezanton një risi: kartolinat personale. Që nga 25 shtatori, kur kërkoni një pagesë, mund të dërgoni edhe një kartolinë të bukur dhe me mesazh personal, në mënyrë që kërkesa të duket më miqësore dhe më argëtuese.

“Me një kartolinë personale duam të zvogëlojmë sikletin që mund të ndodhë kur dikush kërkon një pagesë, dhe ta bëjmë procesin më të lehtë dhe më të gëzueshëm”, shpjegon Jenny Ragnartz, specialiste për PR dhe komunikim në Swish, për Nyheter24.

Deri tani, përdoruesit mund të dërgonin një kartolinë vetëm kur paguanin para, por me këtë funksion të ri kjo gjë është e mundur edhe kur kërkoni një pagesë nga dikush tjetër.