Të gjithë pinë? Jo më: Të rinjtë pijnë gjithnjë e më pak alkool

Prej disa vitesh, përdorimi i alkoolit tek të rinjtë ka rënë ndjeshëm, por megjithatë ideja se “të gjithë pinë” vazhdon të ekzistojë.

Sipas Mojtaba Ghodsi, drejtor i organizatës IQ, raporti më i ri tregon se të rinjtë vazhdojnë të pijnë më pak dhe se alkooli po humbet rëndësinë që kishte dikur.

Raporti tregon se numri i të rinjve që pijnë rrallë ose që vetëm e kanë provuar ndonjëherë është rritur shumë, ndërsa ata që pijnë çdo javë janë sot shumë më të paktë krahasuar me vitin 2017.

Megjithatë, Ghodsi thekson se të rinjtë nuk e kanë ndaluar plotësisht alkoolin, ata pijnë ende, por më pak se brezat e mëparshëm.

“Është e kuptueshme që të rinjtë mendojnë se të gjithë pijnë. Ata nuk kanë me kë ta krahasojnë veten. Ne shohim ndryshimin nëpërmjet shifrave dhe matjeve, por ata jetojnë në mjedisin e tyre, ku njerëzit rreth tyre pijnë. Nuk është se të gjithë janë bërë të përmbajtur. Thjesht ka më pak raste kur pijnë dhe pijnë më pak çdo herë,” shpjegon Ghodsi.

Sipas Ghodsi, është një mit që të rinjtë e kanë zëvendësuar alkoolin me drogë. Në fakt, ata që pijnë më shumë alkool janë edhe ata që përdorin më shumë droga.

Një studim i Universitetit të Stokholmit, që përfshiu mbi 4 000 adoleshentë, tregon se shumica e të rinjve suedezë shmangin plotësisht drogat dhe kriminalitetin.

Rezultatet janë të qarta:

• 75% e të rinjve pijnë pak ose aspak dhe nuk merren me drogë apo krime.
• 22% pijnë shumë, por kanë pak prirje kriminale.
• 2% kombinojnë alkoolin, drogat dhe kriminalitetin.
• Më pak se 1% janë ata që kryejnë më shumë krime ndërkohë që pijnë dhe përdorin droga.

“Zakonisht është një grup i vogël ai që ka rrezikun më të madh për të pasur probleme serioze,” thotë Clas Björklund, doktorand në Institutin për Shkenca të Shëndetit Publik, në një njoftim për shtyp.

Një brez më i kujdesshëm dhe më i vetëdijshëm

Por pse të rinjtë e sotëm pijnë më pak?

Sipas Ghodsi-t, brezi i sotëm është më i kujdesshëm dhe bën pjesë në atë që ai e quan “kulturë të shmangies së rrezikut”.

Raporti i IQ nga viti 2019 tregonte se një në pesë të rinj kishte frikë të humbiste kontrollin kur ishte i dehur.

Sot, ky numër është dyfishuar gjë që tregon se të rinjtë kanë më shumë frikë nga pasojat shoqërore, si për shembull të bëhen për turp apo të dalin në rrjetet sociale pas një nate të dehur.

Ghodsi shton se të rinjtë veprojnë më shumë sipas njohurive të tyre për dëmet e alkoolit, ndërsa më parë njerëzit e dinin që alkooli ishte i dëmshëm, por nuk e merrnin seriozisht.

Fakte: Zakonet e reja të të rinjve ndaj alkoolit

• Dy në tre të rinj thonë se mund të argëtohen po aq edhe pa alkool.
• Nëntë në dhjetë do të pranonin të mos pinin për një vit, nëse do të merrnin diçka në këmbim në vitin 2009, këtë e bënte vetëm gjysma.
• Gjashtë në dhjetë mendojnë se kanë stil jete të matur, edhe pse nuk e kanë ndaluar plotësisht alkoolin.
• Interesi për festat është ulur ndjeshëm në vitin 2001, dy në tre të rinj ishin shumë të interesuar për festa; sot, vetëm katër në dhjetë thonë të njëjtën gjë.

Burimi: IQ, raporti “Rus & unga” / Sydsvenska Dagbladet