Të martuarit me arsim të lartë dhe paga të larta jetojnë më gjatë

Të martuarit që kanë arsim të lartë dhe paga të mira kanë jetëgjatësinë më të madhe, tregon një studim i ri i kryer nga Agjencia Suedeze e Pensioneve. Sipas raportit, diferencat sociale dhe ekonomike ndikojnë ndjeshëm në pritshmëritë e jetëgjatësisë.

Në krye të listës janë individët e martuar me arsim universitar dhe të ardhura të larta, ndërsa grupet që përballen me jetëgjatësinë më të ulët janë personat e pamartuar me arsim të ulët dhe paga minimale.

“Është për të ardhur keq që pabarazitë midis grupeve të të ardhurave janë zgjeruar që nga matjet tona të fundit,” tha Erland Ekheden, kryeaktuar i Agjencisë së Pensioneve, për gazetën DI.

Raporti thekson gjithashtu një diferencë të ndjeshme prej rreth 4 vitesh mesatare në jetëgjatësi midis personave me të ardhura të larta dhe atyre me të ardhura të ulëta.

Ky studim ka ringjallur debatin mbi ndikimin e faktorëve socio-ekonomikë në cilësinë dhe jetëgjatësinë e popullsisë, duke theksuar nevojën për politika që adresojnë këto pabarazi.