Të rinjtë suedezë: Alkooli është më i rrezikshëm se kanabisi

Rreth gjysma e të rinjve në Suedi besojnë se alkooli është më i rrezikshëm se kanabisi. Sipas një sondazhi të bërë nga SVT/Verian, 51% e personave të moshës 18 deri në 29 vjeç thonë se alkooli është më i dëmshëm për shëndetin, ndërsa 37% mendojnë se kanabisi është më i rrezikshëm.

Televizioni suedez SVT ka biseduar me disa studiues që pajtohen me shumicën e të rinjve. Ata shpjegojnë se kërkimet shkencore tregojnë qartë se alkooli është më i dëmshëm për shëndetin sesa kanabisi.

“Sipas kërkimeve që kemi, alkooli është pa dyshim më i dëmshëm për shëndetin,” thotë Mats Ramstedt, përgjegjës për kërkime në Federatën Qendrore për Informimin mbi Alkoolin dhe Narkotikët (CAN).

Megjithatë, shkencëtarët nuk mendojnë se kanabisi duhet të legalizohet. Sipas Markus Heilig, ekspert për varësitë, legalizimi i kanabisit do të ishte “një gabim i rëndë”. Ai shpjegon se përdorimi i alkoolit tashmë shkakton shumë dëme për shoqërinë, dhe se shtimi i dëmeve nga kanabisi do ta përkeqësonte situatën.

“A duhet tani që, përveç dëmeve të mëdha nga alkooli, të shtojmë edhe dëmet që mund të vijnë nga përdorimi i gjerë i kanabisit?”, pyet Heilig.