Të rinjtë suedezë më të palumtur se të moshuarit, studiuesit japin alarmin

Një studim i realizuar nga Lunds universitet ka nxjerrë në pah një zhvillim shqetësues në Suedi: të rinjtë raportojnë se janë më pak të lumtur se të moshuarit. Për këtë studim ka raportuar edhe P4 Malmöhus.

Sipas studiuesit August Nilsson, rreth vitit 2020 ka ndodhur një ndryshim i dukshëm që ka ndikuar negativisht në mirëqenien e të rinjve. Ai thotë se që nga ajo periudhë, të rinjtë kanë filluar të ndihen dukshëm më keq dhe më të palumtur.

Një nga gjetjet më të habitshme të studimit është fakti se të rinjtë 20-vjeçarë ndihen më të vetmuar sesa personat 80-vjeçarë. Sipas Nilssonit, ky është një tregues i fortë se diçka nuk po funksionon mirë në jetën sociale dhe emocionale të brezit të ri.

“Është befasuese dhe disi alarmante”, është shprehur studiuesi, duke theksuar se rezultatet e studimit duhet të merren seriozisht dhe të analizohen më tej për të kuptuar arsyet që qëndrojnë pas këtij zhvillimi.

Burimi: P4

Link: https://www.sverigesradio.se/artikel/lyckokris-bland-unga-carl-25-kanner-sig-olycklig