Transportstyrelsen kundërshton akuzat për heqjen e padrejtë të patentave

Transportstyrelsen ka mohuar akuzat se njerëzit po humbasin patentat për shkak të konsumit të moderuar të alkoolit, edhe kur nuk kanë drejtuar automjet nën ndikimin e tij.

Në një artikull të botuar në Expressen, Ingela Janbjer, drejtuesja e një sektori në Transportstyrelsen, thotë se media ka dhënë një “pamje të gabuar” të situatës. Ajo shpjegon se autoriteti nuk e barazon përkufizimin e tyre për “abuzim me alkoolin” me përkufizimin e Socialstyrelsen për “konsum të rrezikshëm”.

Këto deklarata vijnë pas një hetimi nga Skånska Dagbladet, ku thuhet se mijëra suedezë kanë humbur patentat pasi mjekët kanë raportuar nivele të larta të PEth-it në gjak, që tregon përdorim të tepruar të alkoolit.

Sipas Janbjer, për të arritur kufirin 0.3 në testet PEth, një person duhet të konsumojë mes 28 dhe 42 gota vere ose 21 deri në 28 kanaçe birrë  për një periudhë të gjatë kohe. Ajo thekson se vetëm konsumimi i vazhdueshëm dhe i lartë i alkoolit mund të kalojë këtë kufi.

“Duhet të kryhen disa teste përpara se një mjek të vendosë që një person nuk është i përshtatshëm për të drejtuar automjet dhe të raportojë këtë tek Transportstyrelsen,” thotë Janbjer.

Transportstyrelsen siguron se vendimet për heqjen e patentave janë të kujdesshme dhe nuk bazohen në konsumim të përkohshëm ose të moderuar të alkoolit.