Trump përsërit se SHBA “ka nevojë” për Groenlandën. Danimarka reagon ashpër.

Presidenti i Shteteve të Bashkuara, Donald Trump, ka deklaruar sërish se SHBA-ja dëshiron të ketë kontroll mbi Groenlandën. Ai e bëri këtë deklaratë në një intervistë për revistën The Atlantic, e cila kryesisht trajtonte ndërhyrjen amerikane në Venezuelë.

Gjatë intervistës, Trump nuk e përjashtoi mundësinë që SHBA-ja të ndërhyjë edhe në pjesë të tjera të botës. Ai pretendoi se Groenlanda, ishull me vetëqeverisje që i përket Danimarkës, është “e rrethuar nga anije ruse dhe kineze”.

“Ne kemi nevojë për Groenlandën, absolutisht”, tha Trump.

Këto deklarata kanë shkaktuar reagim të menjëhershëm nga kryeministrja e Danimarkës, Mette Frederiksen. Ajo i quajti deklaratat e Trumpit “krejtësisht të pakuptimta”, sipas televizionit TV2.

“ Shtetet e Bashkuara nuk kanë asnjë të drejtë të aneksojnë ndonjë nga tre vendet që përbëjnë bashkësinë shtetërore: Danimarkën, Groenlandën dhe Ishujt Faroe”, tha Frederiksen.

Ndërkohë, gjatë fundjavës, një ish-bashkëpunëtore e Donald Trumpit, e cila është gjithashtu bashkëshortja e njërit prej këshilltarëve të tij, publikoi një hartë ku Groenlanda paraqitej si pjesë e territorit amerikan. Kjo ka shtuar edhe më shumë tensionet rreth kësaj çështjeje.