Ulja e TVSH për ushqimet shqetëson restorantet

Qeveria suedeze ka propozuar uljen e TVSH-së për ushqimet, por pa përfshirë restorantet dhe pastiçeritë. Kjo ka ngjallur shqetësim të madh në sektorin e gastronomisë.

Në një shkrim në Dagens Industri, përfaqësues të rëndësishëm të industrisë mes tyre nga organizata Visita dhe Shoqata e Bukëpjekësve dhe Pastiçerëve të Suedisë, e quajnë këtë vendim problematik, të pa­logjikshëm dhe fatkeq.

Ata paralajmërojnë se ndryshimi mund të rrisë edhe më shumë dallimin e çmimeve mes dyqaneve dhe restoranteve. Kjo, sipas tyre, do të ulë kërkesën dhe do ta vështirësojë gjendjen e bizneseve që tashmë janë duke luftuar për mbijetesë.

Përfaqësuesit kujtojnë se reforma e vitit 2012, kur TVSH-ja e ushqimeve u harmonizua në 12% për të gjithë zinxhirin ushqimor, pati efekte shumë pozitive dhe u bë një “motor i fuqishëm për krijimin e vendeve të punës” në restorante.

Ata theksojnë se edhe pse synimi i qeverisë për uljen e TVSH-së është i mirë, nëse nuk përfshihen edhe restorantet dhe pastiçeritë, reforma do të bëjë më shumë dëm sesa dobi. Prandaj i bëjnë thirrje qeverisë të rishqyrtojë propozimin dhe të rivendosë harmonizimin e taksës.