Virozat dimërore kanë filluar. Vetëm një në pesë persona është imun.

Sezoni i virozës dimërore ka nisur dhe ekspertët paralajmërojnë për një rritje të rasteve javët e ardhshme.

Numri i rasteve me virozën dimërore, e njohur si një nga sëmundjet më ngjitëse, pritet të rritet ndjeshëm gjatë kësaj periudhe. Sipas Agjencisë Suedeze të Shëndetit Publik, virusi që e shkakton këtë sëmundje mund të mbijetojë për ditë të tëra në sipërfaqe dhe i reziston shumicës së dezinfektantëve. Prandaj, rekomandohet larja e duarve me sapun dhe ujë si metoda më efektive për të shmangur infektimin.

Megjithatë, jo të gjithë janë të rrezikuar njësoj. Thomas Wahlberg, mjek i sëmundjeve infektive në rajonin Västra Götaland, thotë se rreth një në pesë persona ka një strukturë gjenetike që i mbron nga forma më e zakonshme e virozës dimërore.

Si ta dini nëse jeni imun?

“Nëse si i rritur nuk keni përjetuar asnjëherë simptomat e virozës dimërore, ka shumë mundësi që të jeni imun,” deklaroi Wahlberg për radion lokale P4 Sjuhärad.

Pavarësisht kësaj, autoritetet këshillojnë qytetarët të mbeten të kujdesshëm. Kujdesi i shtuar për higjienën dhe shmangia e kontaktit me persona të infektuar mbeten masat më të mira për të parandaluar sëmundjen.