Vit rekord për kronën suedeze, një nga monedhat më të forta në botë gjatë 2025

Viti 2025 ka qenë një vit rekord për kronën suedeze, e cila është forcuar ndjeshëm dhe renditet ndër monedhat më të forta në nivel global. Forcimi është vërejtur kundrejt dollarit amerikan, euros dhe jenit japonez.

Në fillim të vitit 2025, një dollar amerikan kushtonte 11,14 korona suedeze. Aktualisht, dollari tregtohet rreth 9,17 korona. Kjo përbën një nga lëvizjet më të forta vjetore të kronës kundrejt dollarit në kohët moderne. Vetëm rritja e vitit 2003 ka qenë më e madhe.

Forcimi i kronës nuk ka ndodhur vetëm ndaj dollarit. Sipas të dhënave të kompanisë Millistream, gjatë këtij viti korona suedeze është forcuar kundrejt të shtatë monedhave kryesore të krahasuara.

Pas dollarit amerikan, rritja më e madhe është shënuar kundrejt jenit japonez me 17,2% dhe paundit britanik me 10,4%. Krona është forcuar gjithashtu kundrejt euros, si dhe kundrejt monedhave nordike.

Sipas të dhënave, ndryshimi i koronës suedeze ndaj monedhave kryesore gjatë vitit 2025 është si më poshtë:

kundrejt dollarit amerikan +17,9%,

kundrejt jenit japonez +17,2%,

kundrejt paundit britanik +10,4%,

kundrejt koronës norvegjeze +6,5%,

kundrejt koronës daneze +6,0%,

kundrejt euros +5,8%,

dhe kundrejt frangut zviceran +5,1%.

Forcimi i valutës ka pasur ndikim edhe në tregjet e aksioneve. Edhe pse indekset S&P 500, Eurostoxx 600 dhe OMXS30 janë rritur ndjeshëm gjatë vitit në monedhat e tyre lokale, kursi i këmbimit ka qenë vendimtar për investitorët suedezë.

Banka SEB thekson në buletinin e saj të përditshëm të mëngjesit se forcimi i kronës ka konsumuar një pjesë të madhe të rritjes së këtij viti në bursën amerikane për investitorët suedezë.