Vjedhjet në dyqanet suedeze arrijnë nivel rekord.

Vjedhjet në tregtinë me pakicë në Suedi janë rritur ndjeshëm dhe kanë arritur nivelin më të lartë të regjistruar deri më sot. Sipas një njoftimi për shtyp nga Svensk Handel, gjatë vitit të kaluar janë vjedhur mallra me vlerë mbi 11 miliardë krona suedeze.

Kjo shumë përbën rreth 1.1% të xhiros totale të tregtisë me pakicë në vend dhe konsiderohet një rekord i ri për sektorin.

Drejtoresha e sigurisë në Svensk Handel, Nina Jelver, e ka cilësuar situatën si shumë shqetësuese.

“Shifrat që po paraqesim tani janë alarmante. Po vidhet më shumë se kurrë më parë”, tha ajo.

Sipas Jelver, rritja e vjedhjeve tregon se një pjesë gjithnjë e më e madhe e tyre kryhet nga grupe të organizuara kriminale. Ajo thekson se këto grupe shpesh kanë lidhje me bandat kriminale, të cilat po luajnë një rol gjithnjë e më të madh në vjedhjet që ndodhin në sektorin e tregtisë.

Të dhënat e publikuara nga Svensk Handel tregojnë se vjedhjet vazhdojnë të jenë një problem serioz për dyqanet suedeze, ndërsa humbjet ekonomike po arrijnë nivele rekord.

Burimi: TT/Svesnk Handels

Link: https://via.tt.se/pressmeddelande/4422618/brotten-fortsatter-att-oka-stolder-for-over-11-miljarder-kronor-i-handeln?lang=sv&publisherId=1718444